रुपन्देहीमा यात्रुबस दुर्घटना : ९ जनाको मृत्यु, २३ घाईते !

काठमाडौं,बुटवल । रुपन्देहीको भैरहवा–परासी सडक खण्डमा पर्ने रोहिणी खोलामा यात्रु बोकेको बस खस्दा ९ जनाको मृत्यु भएको छ र दुर्घटनामा परेर २३ जना घाइते भएका छन् । आइतबार बिहान करिब साढे ४ बजे खोलामा बस खस्दा घाइते भएका ३२ जना यात्रु मध्ये ९ जनाको मृत्यु भएको हो ।

घाइतेमध्ये ५ जनाको उपचारका क्रममा भैरहवास्थित मेडिकल कलेज र ४ जनाको भिम अस्पतालमा मृत्यु भएको अस्पताल स्रोतलाई उधृत गर्दै स्थानीय प्रहरीले जानकारि दिएको छ । जनकपुरबाट भैरहवातर्फ आउँदै गरेको लु२ख ३८४१ नम्बरको बस रोहिणी पुलको रेलिङ्ग तोड्दै खोलामा खसेको थियो । अन्य घाइतेहरुको भैरहवाको भिम अस्पताल र मेडिकल कलेजमा उपचार भइरहेको रुपन्देही ट्राफिक प्रहरी प्रमुख केशव केसीले जानकारी दिनुभयो । प्रहरीले बसलाई निकालेको र घाइतेको उद्धार गरि अस्पताल पुर्याइएको केसीले जानकारि दिनुभयो ।

भैरहवा–परासी सडक खण्डमा पर्ने रोहिणी पुलबाट यस अघिपनि पटक–पटक गाडीहरु खोलामा खस्ने गरेका छन् । बिहानको समयमा चालक निदाएर बस दुर्घटना भएको हुन सक्ने प्रहरीले प्रारम्भिक अनुमान गरेर थप अनुसन्धान अघि बढाएको छ ।