अर्थमन्त्री शर्माले दिए पदबाट राजीनामा, बिवादमा परेपनि गरे नैतिकताको प्रदर्शन !

काठमाडौं । बजेट बनाउने क्रममा अनाधिकृत व्यक्ति प्रवेश गराएर ठूला व्यवसायीसँग अनाधिकृत लाभ लिएको आरोप खेप्दैआएका अर्थमन्त्री जनार्दन शर्माले आफ्नो पदबाट राजीनामा दिनुभएको छ । आफूमाथि छानबिन गर्न गठित समितिलाई सहयोग गर्ने भन्दै मन्त्री शर्माले संसद बैठकमा सम्बोधन गर्दै राजीनामा घोषणा गर्नुभएको हो ।

प्रतिपक्षी दल एमालेले अर्थमन्त्री शर्माको राजीनामा वा बहिर्गमनको माग गर्दै सम्बोधन बहिष्कार गरेको थियो । अर्थमन्त्री शर्माले राजीनामा माग्ने नागरिक समाजलाई धन्यवाद दिदै आफूले कुनै गल्ती नगरेको दाबी गर्नुभएको छ । राजीनामा घोषणा गर्दै मन्त्री शर्माले छानबिनले ल्याएको सत्य तथ्यका अगाडि उपस्थित भएर आफ्नो अभियानलाई अगाडि बढाउँदै देश र जनताको पक्षमा लागिरहने प्रतिबद्धता समेत जनाउनुभएको छ ।

छानबिन समितिले आफूमाथी हजारौं छानबिन गरेपनि फरक नपर्ने उहाँको दाबी थियो । मन्त्री शर्माले अनाधिकृत व्यक्ति घुसाएर करका दर लगायतका प्रावधान हेरफेर गरेको भन्दै बिरोधसहित छानविनको माग गरिएपछि आज मात्रै ११ सदस्यीय संसदीय छानविन समिति गठन गरिएको थियो ।