डीएसपी ठगबहादुर केसी नै प्रहरी फन्दामा, निवासबाट ३५ तोला सुन र २५ लाख बरामद

काठमाडौं, बुटवल । इलाका प्रहरी कार्यालय बुटवलका प्रहरी नायब उपरीक्षक (डीएसपी) ठगबहादुर केसी पक्राउ परेका छन् । प्रहरी प्रधान कार्यालयको निर्देशनमा बुटवल पुगेको केन्द्रीय अनुसन्धान ब्यूरो (सीआईबी) को टोलीले आइतबार साँझ केसीलाई निवासबाटै नियन्त्रणमा लिएको हो ।

यता पक्राउ परेका केसीले भने आफूलाई बदनाम गराउन खोजिएको दाबी गरिरहेका छन् । इलाका प्रहरी कार्यालयबाट जिल्ला प्रहरी कार्यालय कास्कीमा सरुवा भएका केसी सोमबार रमाना लिई जाने तयारीमा भएपनि सुन कारोबारसम्बन्धी मुद्दामा रकम असुली गरेको विषयमा अनुसन्धान गर्न भन्दै आएको प्रहरी टोलीको नियन्त्रणमा पुगे । केसीको निवासमा खानतलासी गर्दा ३५ तोला सुन र २५ लाख रुपैयाँ नगद प्रहरी टोलीले बरामद गरेको थियो । केसीमाथि गत मंसिरमा बुटवलका एक व्यापारीले ल्याएको सुन नियन्त्रणमा लिएर आफैँले राखेको र व्यापारीसँग २५ लाख रुपैयाँ मागेको आरोप लाग्दैआएको थियो । व्यापारीले २५ लाख रुपैयाँ बुझाए पनि सुन फिर्ता लिन नपाउँदै केसी प्रहरी फन्दामा परे । सुन समेत प्रहरीको कब्जामा पुगेको छ ।

केसी तिनै डिएसपी हुन्, साउन १ मा तिलोत्तमा नगरपालिकाका जनप्रतिनिधि र प्रमुख प्रशासकीय अधिकृतका बीचमा विवाद बढ्दै जाँदा वडाध्यक्षलाई लात्ताले हानेर पोखरीमा खसालेर बहादुरी देखाएका थिए ।