सञ्चालनमा आयो पोखरा अन्तर्राष्ट्रिय विमानस्थल, ४० वर्षपछि पोखराबासीको सपना पूरा

काठमाडौं। पोखरा अन्तर्राष्ट्रिय विमानस्थलको आज औपचारिक उद्घाटन भएसँगै बाह्य पर्यटकको चलहपहल बढ्ने अपेक्षा गरिएको छ । पोखरामा विशेष समारोहका बीच प्रधानमन्त्री पुष्पकमल दाहाल प्रचण्डले अन्तर्राष्ट्रिय विमानस्थल औपचारिक उद्घाटन गर्नुभएसँगै सिधा उडान र पर्यटकिय चहलपहल बढ्ने आँकलन गर्न थालिएको हो ।

विमानस्थल उद्घाटन समारोहमा पोखरावासीको उत्साहजनक उपस्थिति रहेको थियो । हेलिकोप्टरमार्फत् पुष्प वृष्टि गरेर उद्घाटन समारोहलाई भब्य बनाइएको थियो । ४० वर्षदेखीको पोखरावासीको एउटा सपना पुरा भएपनि तत्काल अन्तर्राष्ट्रिय उडानको भने कुनै योजना नरहेको नागरिक उड्डयन प्राधिकरणले जनाएको छ । अन्तर्राष्ट्रिय विमानस्थलसँगै पोखराको प्रवर्द्धन विश्वभर फैलाउने र धेरै पर्यटक भित्र्याउने योजना स्थानीय सरकार, प्रदेश सरकार र पर्यटन व्यवसायीले बनाउन थालेका छन् ।

चिनियाँ निर्माण कम्पनी सीएएमसीईले निर्माण गरेको पोखरा विमानस्थल गत वर्ष चैतमा चीनका विदेशमन्त्री वाङ यीको नेपाल भ्रमणकै अवसरमा नेपाललाई हस्तान्तरण गरिएको थियो । जतिबेला विमानस्थलको केही काम सम्पन्न हुन बाँकी थियो ।चीनको एक्जिम बैंकको २२ अर्ब सहुलियतपूर्ण ऋण र अनुदान सहयोगमा विमानस्थल निर्माण गरिएको छ ।

विसं २०३२ मा जमिन अधिग्रहण गरिए पनि चार दशकपछि विसं २०७३ मा विमानस्थल शिलान्यास भयो । शिलान्याससँगै निर्माणको काम अघि बढ्न सकेन विसं २०७४ देखि मात्रै निर्माणको काम अघि बढेको थियो । कम भिजिबिलिटीमा समेत उडान भर्न सकिने भएकाले विभिन्न बिमान कम्पनीहरुले उडानका लागि इच्छा जाहेर गरेपनि सहमति जुट्न बाँकी छ ।