नेपालमा श्रमिकको न्यूनतम पारिश्रमिक मासिक १७ हजार ३०० पुग्यो !

काठमाडौं । सरकारले श्रमिकको न्यूनतम पारिश्रमिक बढाएर मासिक १७ हजार ३०० पुर्‍याएको छ । श्रम, रोजगार तथा सामाजिक सुरक्षा मन्त्रालयले श्रम ऐन २०७४ अनुसार १ साउन २०८० बाट लागु हुने गरी श्रमिकको न्यूनतम पारिश्रमिक बढाएको भएपनि बिहिवार राजपत्रमा प्रकाशित भएर कार्यान्वयनमा आएको हो ।

यसअघि श्रमिकको मासिक न्यूनतम पारिश्रमिक १५ हजार रुपैयाँ रहेको थियो । अब आधारभूत पारिश्रमिक १० हजार ८२० र महंगी भत्ता ६ हजार ४८० रुपैयाँ गरी १७ हजार ३०० श्रमिकले पाउनेछन। यसअघि आधारभूत पारिश्रमिक ९ हजार ३८५ र मंहगी भत्ता ५ हजार ६१५ रुपैयाँ तोकिएको थियो । मन्त्रालयका अनुसार अब श्रमिकको दैनिक पारिश्रमिक नै ६६८ रुपैयाँ पुगेको छ । यसअघि दैनिक पारिश्रमिक ५७७ रुपैयाँ रहेको थियो । आंशिक समय मात्र काम गर्ने कामदारको अब न्यूनतम पारिश्रमिक ९५ रुपैयाँ प्रतिघण्टा पुगेको छ । यसअघि यो रकम ७७ रुपैयाँ प्रतिघण्टा थियो ।

यसअघि सरकारले २०७८ सालमा श्रमिकको पारिश्रमिक निर्धारण गरेको थियो । चिया बगानका श्रमिकको मासिक पारिश्रमिक १२ हजार ८१ बाट बढाएर १३ हजार ८९३ रुपैयाँ निर्धारण गरिएको छ ।

सामाजिक सुरक्षासहितका सुविधा दिनैपर्ने

सरकारले निर्धारण गरेको पारिश्रमिकका अतिरिक्त श्रमिकले सामाजिक सुरक्षा ऐनले तोकेका सुविधाहरु, श्रम सम्झौता, नियुक्तिपत्र, सञ्चयकोष तथा उपदान अनिवार्य रुपमा पाउने मन्त्रालयका सचिव केवलप्रसाद भण्डारीले जानकारी दिनुभएको छ  । स्थानीय तहले समेत अब यो सूचनामा तोकिएको भन्दा कम नहुने गरी न्यूनतम पारिश्रमिक तोक्नुपर्ने छ । यो रकम भन्दा न्यूनतम हुने गरी अब पारिश्रमिक तोकेर रोजगार सम्झौता गर्न नपाइने तर्फ समेत सबैलाई सचेत गराइएको छ ।