उपप्राध्यापक प्रेम चलाउनेमाथि आक्रमण गर्ने ६ जनालाई २ वर्ष कैद सजाय हुने आदेश

काठमाडौं । जिल्ला अदालत काठमाडौंले त्रिभुवन विश्वविद्यालयका उपप्राध्यापक प्रेम चलाउनेमाथि आक्रमण गर्ने ६ जनालाई २ वर्ष कैद सजायको फैशला सुनाएको छ । न्यायाधीश विनोद खतिवडाको इजलासले नेपाल विद्यार्थी संघ त्रिवि इकाइका तत्कालिन सभापति हरिप्रसाद आचार्य, सचिव योगेन्द्र रावल, रुपेश साह, रविन लामा, सयुज श्रेष्ठ, निरज रानामगरलाई उपप्राध्यापक चलाउनेको ज्यान मार्न खोजेको आरोपमा दोषी ठहर गरेको हो ।

आदेशमा पीडितलाई २८ लाख रुपैयाँ क्षतिपूर्ति भराउन समेत भनिएको छ । आरोपित दीपक ओझाले भने सफाइ पाएका छन् । उपप्राध्यापक चलाउने आफूमाथी ज्यान मार्ने उद्देश्यले आक्रमण भएको भन्दै ढिलै भएपनि न्यायको अनुभुति भएको बताउनुभएको छ । २० असोज २०७७ मा कीर्तिपुरस्थित त्रिभुवन विश्वविद्यालय परिसरमा समाजशास्त्रका उपप्राध्यापक चलाउनेमाथि आक्रमण भएको थियो । टाउको, छाती, घाँटी, तिघ्रामा चोट लागेका उपप्राध्यापक चलाउनेको उपचारका क्रममा अपरेसन समेत गर्नुपरेको थियो । प्रहरीले आचार्य, रावल लगायतमाथि ज्यान मार्ने उद्योग गरेको आरोपमा काठमाडौं जिल्ला अदालतमा मुद्दा दायर गरेपनि धरौटीमा छुटेका थिए ।

सामान्य धरौटीमा छाडिएको भन्दै चलाउनेले उच्च अदालत पाटनमा जिल्लाको आदेश बदरको माग राख्नुभएको थियो ।। उच्च अदालत पाटनले पाँच लाख धरौटीमा छाड्न आदेश दिएको थियो । जिल्ला अदालत काठमाडौंमा विचाराधिन रहेको अवस्थामा गृहमन्त्रालयको प्रस्तावमा सरकारले आरोपितहरुविरुद्धको मुद्दा फिर्ता लिने निर्णय लिएपछि चलाउने रिट बोकेर सर्बोच्च अदालत समेत पुग्नुभएको थियो ।