डीआईजी चन्दको राजीनामा फिर्ता, १० दिन बिदा बसेर काममा फर्किन महानिरीक्षक कुँवरको सुझाव

काठमाडौं । त्रिभुवन अन्तर्राष्ट्रिय विमानस्थल सुरक्षा कार्यालयका प्रमुख डीआईजी अर्जुन चन्दको राजीनामा ‘रितपूर्ण’ नभएको भन्दै प्रहरी प्रधान कार्यालय, नक्सालले अस्विकृत गरेको छ । मानव स्रोत विभागमा पुगेको चन्दको राजीनामाको पत्र रितपूर्वक नभएको भन्दै फिर्ता गरिएको हो ।

शनिवार राजिनामाको हल्ला बाहिरिए पनि ‘घरायसी’ कारण देखाउँदै डीआईजी चन्दले राजीनामा दिएको पत्र आइतबार प्रहरी प्रधान कार्यालयको मानवस्रोत विभागमा पुगेको थियो । सोमबार प्रहरी महानिरीक्षक आईजीपी वसन्तबहादुर कुँवर, मानवस्रोत विभागका प्रमुख एआईजी टेकप्रसाद राईलगायतले चन्दसँग छलफल गरेर राजीनामा नदिन आग्रह गर्नुभएको पाइएको छ । २९ वर्ष प्रहरी सेवामा बिताएपछि केही महिना बाँकी रहँदा राजीनामा दिँदा राम्रो सन्देश नजाने भन्दै आईजीपी कुँवरले निर्णय फिर्ता लिन आग्रह गर्नुभएको थियो । किन कि डीआईजी चन्द कुँवरकै ब्याचमेट हुनुहुन्छ । मानवस्रोत विभागका प्रमुख राईले ‘राजीनामाको पत्र समेत रितपूर्वक नभएको’ बताएपछि महानिरीक्षक कुँवरले १० दिन बिदा बसेर आउन आग्रह गर्दै पठाउनुभएको पाइएको छ ।

विमानस्थलमा अध्यागमन कर्मचारी र प्रहरीबीच कुटपिट भएको घटनामा डीएसपी, असई र जवानलाई कारबाहीको सिफारिस भएपछि डीआईजी चन्द रुष्ट बन्नुभएको थियो । डीआईजीहरुको सरुवामा प्रदेशको नेतृत्व नपाएको असन्तुष्टि समेत चन्दले राख्दैआउनुभएको पाइएको छ ।