उद्धार उडानबाट १७ हजार बढी नेपाल फर्किए, आज मात्रै ११ अन्तर्राष्ट्रिय उडान
काठमाडौं । शुक्रबारसम्म हवाई उडानमार्फत विभिन्न २१ देशमा अप्ठ्यारोमा परेका १७ हजार २ सय १२ नेपाली नागरिक स्वदेश फिर्ता भएका छन् । यसरी स्वदेश फर्किनेमा सबैभन्दा बढी बागमती प्रदेशका छन् । विभिन्न मुलुकमा जारी राखिएको नेपालीको उद्धारका क्रममा शनिबार समेत त्रिभुवन अन्तर्राष्ट्रिय विमानस्थलबाट ११ अन्तर्राष्ट्रिय उडान हुँदैछन् ।
नेपाल वायुसेवा निगम (नेपाल एयरलाइन्स) र हिमालय एयरलाइन्सका केही जहाज अवतरण भएका छन भने बाँकी अन्य एयरलाइन्स काठमाडौँ विमानस्थलमा अवतरण गरेर पुनः उद्धार उडानमा फर्कने छन् । नेपाल एयरलाइन्सका दुई जहाज साउदी अरेबियाको रियाद र दमामबाट शनिबार बिहान काठमाडौँ अवतरण गरेका छन् । नेपाल एयरलाइन्सकै जहाज आजै दोहा र क्वालालम्पुर प्रस्थान गर्ने उडान तालिका छ । कुवेतबाट नेपाली लिएर आज विहान विमानस्थलमा अवतरण भएको हिमालय एयरलाइन्स राति कतारको दोहा र आबुधाबी उड्ने तालिका छ । टर्किस एयरलाइन्स नेपाली समय अनुसार आज राति ९ बजे काठमाडौँ विमानस्थल अवतरण गरेर राति १०ः३० बजे इस्तानबुल फर्कने बताइएको छ । मध्याह्न तिर कतार एवरवेजले दोहा र जजीरा एयरवेजले कुवेतबाट नेपालीलाई उद्धार गरेर काठमाडौँ ल्याउने उडान तालिका छ ।
शुक्रबार ११ अन्तर्राष्ट्रिय उडान भएको त्रिभुवन अन्तर्राष्ट्रिय विमानस्थलमार्फत ९१८ यात्रु नेपाल भित्रिएका थिए । कोभिड–१९ महामारीका कारण विभिन्न देशमा अलपत्र नेपालीलाई स्वदेश ल्याउन नेपाल एयरलाइन्स र हिमालय एयरलाइन्सले दैनिक पाँचदेखि छ वटासम्म उडान भर्दा कतार एयरवेज, जजीरा एयरवेज, एयर अरेबिया, टर्किसलगायत विदेशी एयरलाइन्सले नेपालमा चार्टर्ड उडान भर्दै आएका छन् ।
लाइभ न्युज
तपाईको प्रतिक्रिया