भोटेकोशीको बाढीले ३३ घर बगायो

काठमाडौं– सरकारले सचेत रहन आग्रह नगर्दै बुधबार राती सिन्धुपाल्चोकमा बाढीले वितण्डा मच्याएको छ । सरकारले २५ गतेदेखि देशभर बाढी पहिरोको डर देखिएको बताउँदै आएको थिथो । तर, सही समयमा जोखिमपूर्ण अवस्थाका स्थानीयलाई सुचित नगर्दा भोटेकोसी नदी करिडोरका बस्तीले ठूलो जनधनको क्षतिको व्यर्होनु परेको छ । बाढीले ३३ घर बगाएको छ । २० जना बेपत्ता छन् । हालसम्म दुईको मृत्यु पुष्टि भएको छ ।

खहरे खोला उर्लिँदा बिहानपख बस्ती बगाएको थियो । जिल्ला प्रहरी कार्यालयका डिएसपी माधवप्रसाद काफ्लेले क्षतिबारे विवरण संकलन र उद्दारको कार्य भइरहेको जानकारी दिए । उनले भोटेकोसी गाउँपालिका–५ बुल्कुटीका दुई घर बग्दा चार बेपत्ता भएको बताए ।
प्रमुख जिल्ला अधिकारी उमेशकुमार ढकालले घटनास्थलमा सुरक्षाकर्मी पुगेर उद्धार कार्य भइरहेको जानकारी दिए ।