कोभिड–१९ संक्रमणबाट विदेशमा एक जनाको मृत्यु, महामारिकाबीच १ लाख २० हजार स्वदेश फर्किए

काठमाडौं । विश्वव्यापी महामारी कोभिड–१९ संक्रमणबाट गत साता विदेशमा थप एक नेपालीको मृत्यु भएको छ । साउदी अरबमा एक नेपालीको कोरोना संक्रमणबाट निधन भएको गैरआवासीय नेपाली संघ (एनआरएनए)ले जानकारी दिएको हो ।

एनआरएनए, स्वास्थ्य समितिका संयोजक डा सञ्जीव सापकोटाका अनुसार ४२ देशमा रहेका नेपालीमध्ये ४२ हजार ७५२ नेपाली कोरोना भाइरसको संक्रमणमा परेका छन् । तीमध्ये ३९ हजार १७९ जना अर्थात् ९२ प्रतिशतले कोरोना जितेका छन् । गत साता भारत, कतार र स्पेनमा रहेका नेपालीमा थप कोरोना संक्रमण देखिएको छ । हालसम्म १९ देशमा रहेका २८४ नेपालीको कोरोना संक्रमणबाट निधन भएको एनआरएन, कोभिड–१९ उच्चस्तरीय समितिका प्रेस संयोजक चिरन शर्मा जानकारी दिनुभएको छ । नेपालमा मात्र एक लाख ५५ हजार २३३ जना कोरोना भाइरसबाट संक्रमित हुँदा एक लाख आठ हजार ३३४ जना कोरोनामुक्त भएका छन् । शनिबार साँझसम्म नेपालमा ८४२ जनाले कोरोना संक्रमणका कारण ज्यान गुमाएका छन् ।

मास्कको प्रयोग गरौं
एनआरएन स्वास्थ्य समितिले मास्क प्रयोगका कारण संक्रमण वृद्धिदर दरमा निकै कम हुने भएकाले सबैलाई अनिवार्य मास्क प्रयोग गर्न आग्रह गरेको छ । अमेरिका र युरोपका देशमा गरिएको एक अध्ययनले संक्रमण रोक्ने मुख्य साधन मास्क भएको निष्कर्ष निकालेको दाबी गर्दै एनआरएनए स्वास्थ्य समितिले सार्वजनिकस्थलमा निस्कँदा मानिसलाई सकेसम्म मास्क प्रयोग गर्न, हात धुन, मुख नछुन र नाक नकोट्याउन अनुरोध गरेको हो ।

एक लाखको उद्धार
कोरोना महामारीपछि विदेशमा भएको लकडाउनका कारण अलपत्र परेका नेपालीको उद्धार अझ पनि जारी छ । गैरआवासीय नेपाली संघ, नेपाल सरकार र विदेशस्थित नेपाली कूटनीतिक नियोगको संयुक्त पहलमा हालसम्म ३२ देशमा रहेका एक लाख २० हजार ८२९ नेपालीको उद्धार भएको छ ।