बन्दना राणा दोश्रो कार्यकालका लागि संयुक्त राष्ट्रसंघीय सिड कमिटिमा निर्वाचित

काठमाडौं । बन्दना राणा महिलाविरुद्ध हुने सबै प्रकारका भेदभाव अन्त्यसम्बन्धी संयुक्त राष्ट्रसंघीय समिति (सिड) को सदस्यमा पुनः निर्वाचित हुनुभएको छ । न्यूर्योकमा सोमबार भएको कमिटिको २१ औँ बैठक अन्तर्गत भएको चुनावमा १३७ देशको मत पाएर राणा पुनः निर्वाचित हुनुभएको हो ।

राणा दोस्रो कार्यकालका लागि सिडको सदस्यमा निर्वाचित भएको संयुक्त राष्ट्रसंघका लागि नेपालको स्थायी मिसनले समेत पुष्टि गरेको छ । १९ उम्मेदवार मध्ये सर्वाधिक मत पाउनेको सूचिमा राणा तेस्रो हुनुभएको छ । सन् २०२१–२०२४ को कार्यकालका लागि उहाँसँगै ११ उम्मेदवार निर्वाचित भएका छन् । नेपालकी राणासँगै नेदरल्याण्डस, बहमास, लिथुवानिया, घाना, अस्ट्रेलिया, मेक्सिको, लेबनान, फ्रान्स, फिलिपिन्स र चीनका विज्ञहरु पनि सिटका लागि निर्वाचित भएका छन् ।

तीन दशकदेखि लैंगिक समानता र महिला अधिकारको पक्षमा काम गर्दै आउनुभएकी राणा हाल सिड कमिटिकी उपाध्यक्ष समेत हुनुहुन्छ । राणा सिड कमिटिमा रहेर काम गर्ने पहिलो नेपाली समेत हुन् ।