Techie IT
Fri, September 24, 2021  |   शुक्रबार, अशोज ८, २०७८

Grow your business

गृहपृष्ठ » Breaking News » वसन्त ऋतुमा हिमाल आरोहण गर्न ६२६ जनालाई अनुमति, ३३८ जना सगरमाथा चढ्दै

वसन्त ऋतुमा हिमाल आरोहण गर्न ६२६ जनालाई अनुमति, ३३८ जना सगरमाथा चढ्दै


172 Views

काठमाडौं । वसन्त ऋतुको आरोहण सिजनका लागि हालसम्म विभिन्न देशका ३ सय ३८ जनाले विश्वको सर्वोच्च शिखर सगरमाथा आरोहणको अनुमति लिएका छन् । पर्यटन बोर्डका अनुसार ८ हजार ८४८.८६ मिटर उचाईको सगरमाथा आरोहणका लागि गएको शुक्रबारसम्ममा ३६ टिमका २६६ पुरुष र ८४ महिला गरि कुल ३३८ जनाले आरोहण अनुमति पाएका छन् ।

सन् २०१९ मा विभागले ३८१ जनालाई सगरमाथा आरोहण अनुमति दिएको थियो । पर्यटन विभागकी निर्देशक मीरा आचार्य यो वर्ष आरोहण अनुमति लिनेको संख्या ३५० भन्दा बढि पुग्ने बताउनुहुन्छ । आरोहण अनुमतिका लागि लिइने शूल्क बापत हालसम्म सगरमाथाबाट मात्रै ४० करोड ५० लाख ९७ हजार भन्दा धेरै राजश्व संकलन भएको छ । गएको चैत १३ गते यो वर्षको पहिलो आरोण अनुमति जारी गरेको विभागले जनाएको छ । वर्षको वसन्त ऋतु सिजनमा पहिलो आरोहण अनुमति बहराइनका राजकुमार मोहम्मद हमाद मोहम्मद अल खलिफासहितको १६ सदस्यीय टोलीले लिएको थियो । सन् २०१९ यता पहिलोपटक हिमाल आरोहणको अनुमति यो वर्ष जारी भएको हो ।

गएको वर्ष कोरोना भाइरस महामारीका कारण आरोहण हुन सकेको थिएन । यो पटक आरोहण गर्नेहरुले उचाई थपिएको सगरमाथा चढ्ने छन् । गत वर्ष नेपाल र चीनले संयुक्त रुपमा गरेको मापनमा सगरमाथाको उचाइ केही बढेर ८ हजार ८४८.८६ मिटर पुगेको थियो । त्यसअघि सर्वोच्च शिखर सगरमाथाको उचाइ ८ हजार ८४८ मिटर थियो । यो वर्षको वसन्त ऋतु सिजनका लागि सगरमाथापछि लोत्से हिमाल आरोहणका लागि ११ टिमले अनुमति लिएका छन् । ८ हजार ५१६ मिटर उचाईको लोत्से हिमाल आरोहणका लागि ८१ पुरुष र २३ महिला गरि कुल १०४ जनाले अनुमति लिएको विभागको रेकर्ड छ । यसबाट दुई करोड १९ लाख तीन हजार रुपैयाँ भन्दा बढि राजश्व संकलन भएको छ । अन्नपूर्ण पहिलो र धौलागिरि पहिलोका लागि समान चार–चार टोलीले अनमुति लिएका छन् ।

गएको शुक्रबारसम्म सगरमाथासहित १६ हिमाल आरोहणका लागि ७१ टोलीका तर्फबाट ४९३ पुरुष र १४५ महिला गरि कुल ६२६ जनाले अनुमति पाएका छन् । आरोहणको यो अनुमतिबाट ४५ करोड १९ लाख ५५ हजार ४९४ रुपैयाँ राजश्व संकलन भएको पर्यटन विभागले जानकारी दिएको छ ।

क्याटेगोरी : Breaking News, Nepal



प्रतिक्रिया दिनुहोस

-Advertisement-