फिल्म‘उचाई’ को सुटिङका लागि बलिउडका तीन कलाकार नेपालमा

काठमाडौं । बलिउडका तीन कलाकार फिल्म सुटिङका लागि नेपाल आएका छन् । सोमबार बिहान अभिनेता अनुपम खेरसहित बोमन इरानी, परिणिती चोपडा काठमाडौँ आइपुग्नुभएको हो ।

नेपाल पर्यटन बोर्डका निर्देशक मणिराज लामिछानले बलिउड कलाकारको टोली नेपालको मुस्ताङ लगायतका क्षेत्रमा ‘उचाई’ फिल्म सुटिङ गर्ने प्रयोजनका लागि नेपाल आएको जानकारी दिनुभएको छ । टोली सोमबार काठमाडौं आएपनि सुटिङ स्थलतर्फ कहिले प्रस्थान गर्छ भन्ने बारे केही खुलाइएको छैन । बलिउडको प्रख्यात राजश्री प्रोडक्सनको ब्यानरमा बन्न लागेको फिल्म मुस्ताङका विभिन्न स्थानमा छायाँकन हुने बताइएको छ । चलचित्रको छायाङ्कनका लागि स्थल अवलोकन गर्न निर्माता निर्देशक सुरज बडाजात्याको टोली भदौ अन्तिमतिर मुस्ताङ पुगेर फर्किएको थियो ।

मनाङमा करिब १० दिन फिल्मको छायाङ्कन हुने बताइएको छ । फिल्मका लागि नेपालका अन्य स्थानसमेत छनोट भएको भएपनि विस्तृतमा खुलाइएको छैन । अभिनेता अनुपम खेरले लामो समयपछि काठमाडौं आउने मौका मिलेको भन्दै ट्वीटरमार्फत खुसी व्यक्त गर्नुभएको छ ।