सिड्नीमा एक नेपाली विद्यार्थी मृत भेटिए । शव नेपाल पठाउन सहयोग संकलन

सिड्नी/ अष्ट्रेलियामा एक नेपाली युवती मृत अवस्थामा भेटिएको छ । सिड्नीस्थित लेनकोभमा २२ वर्षिय सुस्मिता कपाली मृत अवस्थामा भेटिएको हो । किर्तिपुर घर भएकी कपाली अध्ययनका लागि सन् २०२० मा अष्ट्रेलिया आउनु भएको बुझिएको छ । घटना बारे न्यु साउथ वेल्स प्रहरीले अनुसन्धान गरिरहेको छ । मृतकको शव नेपाल पठाउन न्यु साउथ वेल्सको गैर आवासिय नेपाली संघले गो फण्ड मि मार्फत सहयोग संकलन सुरु गरेको छ ।

संघका युवा संयोजक बिक्रम दाहालले शव पठाउनका लागि सहयोग संकलन गर्न गोफण्डमिमा अभियान सुरु गर्नुभएको हो । अभियानबाट १० हजार डलर संकलन गर्ने लक्ष्य राखिएको छ । परिवारको अनुमतिमा सहयोग संकलन सुरु गरिएको हो ।

मृतक सुष्मितालाई नजिकबाट चिन्ने एनआरएनए अभियन्ता उद्धव भट्टले यो घटनाले आफु आश्चर्यमा परेको बताउनुभयो । निकै मेहनति र मिजासिली स्वाभावकी सुष्मिताको असामहिक निधनले आफु निकै स्तब्ध भएको भट्टले बताउनुभयो । हाल काठमाडौंमा रहेका भट्टले सुष्मिताको परिवारलाई भेटेर सान्त्वता दिइसक्नु भएको छ । परिवारको आर्थिक अवस्था निकै कमजोर भएकाले सबैले सहयोग गरिदिन समेत भट्टले आग्रह गर्नुभयो ।
तपाई पनि सहयोग गर्न चाहानुहुन्छ भने यो लिंकमा जानुहोस् ।