कोरोना खोप नलगाएकाले पनि अब अष्ट्रेलिया आउन पाउने, ट्रान्जिटमा के गर्ने ?

ब्रिजबेन,अष्ट्रेलिया। कोरोना भाइरसविरूद्धको भ्याक्सिन नलगाएका व्यक्तिहरूले पनि अब अष्ट्रेलियामा प्रवेशको अनुमती पाउने भएका छन्। स्वास्थ्यमन्त्री मार्क बट्लरले एक विज्ञप्तीमार्फत अष्ट्रेलिया प्रवेश गर्दा कोरोना भाइरस विरूद्धको खोप लगाएको प्रमाण देखाउन नपर्ने जानकारी दिनुभएको हो ।

स्वास्थ्यमन्त्री बट्लरले परिवर्तित यो नियम जुलाइ ६ तारिखदेखि लागु हुने विज्ञप्तीमार्फत जानकारी गराउनुभएको छ।अष्ट्रेलियाका प्रमुख स्वाथ्य अधिकारीको सुझावका आधारमा बायोसेक्युरिटी याक्ट २०१५ मार्फत गरिएको अनिवार्य खोपको प्रावधान हटाइएको बताइएको छ । अष्ट्रेलिया सरकारले अनिवार्य खोपको प्रावधान हटाएपनि यात्रुहरूले एयरलाइन्स तथा अन्य राज्यहरूले लागू गरेका कोरोनासँग सम्बन्धित कुनै प्रमाणहरू मागेको अवस्थामा भने देखाउनु पर्नेछ। ट्रान्जिटका क्रममा सोही राज्यको नियम र एयरलाइन्सको नियम पालनामा भने यात्रु गम्भिर बन्नुपर्नेछ ।

उडानका क्रममा मास्क लगाउने र आन्तरिक उडानमा सरकारले तोकेका अन्य स्वास्थ्य सावधानीका शर्तहरू पालनामा भने कुनै फेरबदल गरिएको छैन ।