भेट्न बोलाएर अपहरणसँगै फिरौती माग, अन्ततः ६ जनाको गिरोह प्रहरी फन्दामा !

काठमाडौं,दाङ । दैलखका एक युवकलाई भेट्न बोलाएर अपहरण गरी फिरौती माग्ने ६ जना प्रहरी फन्दामा परेका छन् । दैलेखको चामुण्डाबिन्द्रसैनी नगरपालिका ३ का २७ वर्षीय युवकलाई भेट्न बोलाएर अपहरण गरी फिरौती माग्ने ६ जनालाई प्रहरीले तुलसीपुरको एक होटलबाट पक्राउ गरेको हो ।

पक्राउ पर्नेमा दाङको बबई गाउँपालिका ४ का एक महिला र एक पुरुष, तुलसीपुर ४ का एक पुरुष, कपिलवस्तुको शिवराज नगरपालिका ७ का एक युवा र प्युठानको गौमुखी गाउँपालिका ७ घर भइ दाङको तुलसीपुर ६ बस्ने अर्का एक युवा रहेका छन् । फोन गरी भेट्न बोलाउने तुलसीपुर ७ की २६ वर्षीया युवतीलाई समेत प्रहरीले पक्राउ गरेको छ ।

यसरी गरिएको भियो अपहरण  र फिरौती माग
अपहरणमा पर्ने युवकलाई सोमवार राति नौ बजेतिर निर्मलाले बुटवलमा भेट्न बोलाएकी थिइन् । दैलखबाट बुटवलमा भेट्न आएका युवकलाई युवतीसँग भेट भएपछि ६ जनाको समूहले अपहरण गरेर मंगलबार तुलसीपुर ल्याएको प्रहरी अनुसन्धानबाट खुलेको छ । यसपछि युवकलाई तुलसीपुरको एक होटेलमा राखेर सात लाख रुपैयाँ फिरौती मागिएको थियो ।

फिरौती नदिए जे पनि हुन सक्ने भन्ने परिवारमा फोन गएपछि कुमारकी श्रीमतीले प्रहरीमा जाहेरी दिनुभएको थियो । दिउँसो ४ बजे प्रहरीमा जानकारी आएपछि इलाका प्रहरी कार्यालय तुलसीपुरका प्रमुख श्यामु अर्यालको नेतृत्वमा खटिएको टोलीले होटलबाट अपहरित व्यक्तीलाई उद्धार गर्दै ६ जनालाई पक्राउ गरेको थियो ।