भारतलाई पराजित गर्दै यू–१७ साफ च्याम्पियनसिपको सेमिफाइनलमा नेपाल !

काठमाडौं। श्रीलंकामा जारी यू–१७ साफ च्याम्पियनसिपमा भारतलाई ३–१ गोलले पराजित गरेर नेपाल सेमिफाइनलमा प्रवेश गरेको छ। पहिलो हाफमा भारतसँग १–१ को बराबरी खेलेको नेपालले दोस्रो हाफमा दुई गोल थप्दै जित सुनिश्चित गरेको हो ।

श्रीलंकाको राजधानी कोलम्बोमा सम्पन्न खेलको २५औं मिनेटमा डेनी मैतेइलले गोल गर्दै भारतलाई अग्रता दिलाएका थिए । पहिलो हाफको निर्धारित समयको एक मिनेट बाँकी रहँदा नेपालका सरोज दर्लामीले गोल गर्दै खेल बराबरीमा ल्याए । खेलको दोस्रो हाफपछि अर्थात ४९ मिनेटमा नेपालका लागि उनेश बुढाथोकी र ६७ औँ मिनेटमा सुवास बमले गोल गर्दै नेपाललाई ३–१ मा पुर्‍याएका थिए।

यो जितसँगै नेपाल समूह विजेता बनेर सेमिफाइनलमा प्रवेश गरेको छ।  नेपालले पहिलो खेलमा भुटानलाई २-१ गोल अन्तरले हराएको थियो ।