ब्रिजवेन
राम्रो चलचित्र बने हलहलमा दर्शकको बाढी लाग्छ भन्ने कुरा जात्रैजात्राले पुष्टी गरिदिएको छ । सामान्य कथामा अब्बल चलचित्र बनेको भन्दै दर्शकको वाहवाही पाएको जात्रैजात्राको क्रेज अष्ट्रेलियामा पनि उत्तिकै देखिएको छ ।
सबै शोहरु हाउसफुल हुन थालेपछि दर्शकले भूइमै बसेर भएपनि सिनेमा हेरेका छन् । मंगलबार व्रिजवेनमा भएको दोस्रो शो हाउसफुल भएपछि २० जना दर्शकले भूइ र सानो कुर्सीमा बसेर सिनेमा हरेका हुन् ।
हाउसफुल भइसकेपछि आएका दर्शकहरुले जसरी पनि सिनेमा हेर्नुपर्ने माग गरेपछि आयोजकले हल प्रशासनसंग अनुमति लिएर केही कुर्सी थप गरेको हो । थप कुर्सीमा बसेकाहरुलाई न्युन शुल्क लिएकाे आयाेजकले जनाएकाे छ ।
व्रिजवेनमा एकैपटकमा ६० वटा सम्म टिकट बेचेका अमृत खत्रीले यसअघिको कुनै पनि नेपाली सिनेमाको टिकटका लागि यति धेरै माग आएको आफुले थाहा नपाएको बताउनुभयो ।
‘अन्तिम समयमा हलमा पुगेका दर्शकहरुले अनुरोधलाई नकार्न नसकेपछि हामीले विकल्प खोजेका हौं’ – नेप्स्ब्रिजवेनका संचालक अरुण तिवारीले भने -‘अब हामी अरु शोहरु ठुलो हलमा देखाउने तयारी गरिरहेका छौ’ ।
व्रिजवेनमा पहिलो २६० र दोस्रो शो भएको हलमा १७५ जनाको क्षमता थियो ।
त्यस्तै अष्ट्रेलियाको सिड्नी र तासमानियामा पनि शोहरु हाउसफुल भएका छन् । सिड्नीमा त दर्शकको चाप खेप्न नसकेर तोकिएको ४ शोलाई बढाएर ८ शो बनाइएको अष्ट्रेलियाको वितरण जिम्मा पाएको ‘हो र होइन होला’ इभेन्टले जनाएको छ ।
सबै शोहरु हाउसफुल हुन थालेपछि अन्य शहरहरुमा पनि तोकिएको भन्दा थप शोहरु थपिएको इन्भेन्टका संचालक रोशन भट्टराईले जानकारी दिनुभयो ।
त्यस्तै एडिलेडमा दर्शकको चापलाई व्यवस्थापन गर्न पहिलो पटक एकचोटी तीन वटा हलमा जात्रैजात्रा प्रशर्दन हुने भएको छ ।
पर्थ, मेलवर्न र क्यानवेरामा पनि टिकट बिक्रीको चाप उत्तिकै बढेको बताइएको छ ।
प्रर्दशनको सुरुवातदेखि नै आक्रामक व्यापार गरेको जात्रैजात्रालाई अष्ट्रेलियामा हो र होइन होला इभेन्टले ल्याएको हो । जसका लागि इभेन्टले ३० लाख रुपैया भन्दा बढी रकम तिरेको बताइएको छ ।
फणिन्द्र अष्ट्रेलिया आउदै ।
यसैबिच जात्रैजात्राका मुख्य पात्र मध्येको एक विपिन कार्की (फणिन्द्र ) अष्ट्रेलिया आउने भएका छन् ।
अर्को साता भ्रमण तय भएको विपिनले सिड्नी, ताजमानिया, एडिलेड, र क्यानवेरामा दर्शकसंगै बसेर सिनेमा हेर्ने कार्यक्रम छन् । निजी भ्रमणमा अष्ट्रेलिया आउन लागेकी अर्का कलाकार वर्षा राउत पनि सिड्नीमा विपिनसंगै उपस्थित हुने आयोजकले जानकारी दिएको छ ।
