फ्रान्स पठाउने बहानामा १९ लाख ठगी गर्ने एकजना काठमाडौंबाट पक्राउ

काठमाडौं । फ्रान्स पठाइदिन्छु भनेर विभिन्न व्यक्तिसँग १९ लाख रुपैयाँ ठगी गरेको आरोपमा प्रहरीले एकजनालाई पक्राउ गरेको छ । तनहुँको शुक्लागण्डकी नगरपालिका—८ घर भई हाल काठमाडौंको चन्द्रागिरी नगरपालिका–५ सतुङगल बस्दैआएका ४६ वर्षीय महत थरका एक व्यक्तिलाई प्रहरीले पक्राउ गरेको हो ।

काठमाडौं उपत्यका अपराध अनुसन्धान कार्यालयको टोलीले सतुङ्गलबाट ठगी अभियोगमा पक्राउ गरेका व्यक्तिलाई थप अनुसन्धानका लागि वैदेशिक रोजगार विभाग बुद्धनगर पठाइएको छ । राजेन्द्र रानामगरसहित ३ जनासँग प्रतिव्‍यक्ति १० लाख रुपैयाँ भन्‍दै पटक पटक गरेर १९ लाख रुपैयाँ लिई सम्पर्कविहीन भएको अभियोगमा प्रहरीमा उजूरी परेको थियो । पक्राउ अभियुक्तमाथी अनुसन्धानसँगै थप कानुनी कारबाही अघि बढाइने विभागले जानकारि दिएको छ ।