अभिनेता पल शाह एक वर्षपछि जेलमुत्त, तनहुँ प्रहरी प्रमुख विष्टले गरे जेलमै स्वागत

काठमाडौं । अभिनेता पल शाह पक्राउ परेको ठिक एक वर्षपछि आज जेलबाट छुटेका छन् । शाहमाथि अभियोग दाबी नपुग्ने ठहरसहित उच्च अदालत पोखराले आइतबार सफाइ दिएसँगै ठिक एकवर्षपछि अर्थात फागुन १५ गते नै जेलमुक्त भएका हुन् ।

बलात्कारको आरोप लागेपछि शाहले ठीक एक वर्षअघि अर्थात फागुन १५ मा तनहुँ पुगेर प्रहरीसमक्ष आत्मसमर्पण गर्नुभएको थियो । सोमबार बिहान तनहुँ कारागारको गेटमा पलको स्वागतका लागि समर्थकको भीड लागेको थियो । उनीहरूले ‘पल शाह हाइहाइ’, ‘पललाई न्याय भयो’ भन्दै नाराबाजी गरेका थिए । पललाई बधाई दिन तनहुँ प्रहरी प्रमुख डीएसपी अवदेश विष्ट जेलमै पुग्नुभएको थियो । बलात्कारको अभियोग दर्ता भएपनि नवलपुर जिल्ला अदालतले बाल यौन दुर्व्यवहारमा दोषी ठहर गरेको थियो । तनहुँ जिल्ला अदालतले भने शाहलाई निर्दोष ठहर गरेको थियो । एउटै व्यक्तिले शाहविरुद्ध दुईवटा जिल्लामा बलात्कारको उजुरी दिएकी थिइन् ।

कलाकारिताका क्षेत्रमा सँगै हिड्नी नाबालिग गायिकाबाट बलात्कारको आरोप खेप्नुपरेका पलमाथी प्रतिसोध साध्न केहीले उक्साएको वा प्रयोग गरेको चर्चा समेत चलेको थियो । प्रहरीमा बलात्कारको उजुरी दिएकी जाहेरवालाले अदालतमा भने उजुरी झुटो भएको बकपत्र गरेकी थिइन् । यसपछि यो मुद्धामा पीडित होस्टाइलको सिकार भएको चर्चा चलेको थियो ।