प्रहरीको नयाँ आईजीपीमा बसन्त कुँवर नियुक्त, यसरी मारे छलाङ

काठमाडौं । पहिलो नम्बरमा बढुवा भएर दुईदिन अघि मात्रै एआईजीको फुली लगाउनुभएका बसन्त कुँवर प्रहरी महानिरीक्षक (आईजीपी) नियुक्त हुनुभएको छ । शुक्रबार अपरान्ह बसेको मन्त्रिपरिषद बैठकले एआईजी कुँवरलाई आईजीपिमा बढुवा गर्ने निर्णय गरेको हो ।

दुई दिनअघि मात्र एआईजीको फुली लगाएका कुँवरसहित ५ जना आईजीपी बन्ने होडमा थिए । कुँवरले २०८१ चैतसम्म नेपाल प्रहरीको आईजिपीको जिम्मेवारी सम्हाल्नेछन् । हालका आईजिपी धिरजप्रताप सिंहले ३० वर्षे सेवा अवधिका कारण शुक्रबार राती १२ बजेदेखि अनिवार्य अवकाश पाउँदैछन् । उनीसहित ९ जना उच्च प्रहरी अधिकारी एकसाथ उमेर हदका कारण अवकाश हुन लागेका हुन्। सिंह गत बैशाखको तेस्रो साता मात्रै आईजीपी बनेका थिए ।

एसएसपीबाट डीआईजी बढुवा हुनेक्रममा छलाङ मारेका कुँवर नेपाली कांग्रेसनिकट मानिन्छन् । गत असारमा एसएसपीबाट पहिलो नम्बरमा डीआईजीमा बढुवा हुनुभएका कुँबर एआईजीमा बढुवा गर्दा समेत वरियता हेरफेर नगरि पहिलो नम्बरमा पर्नुभएको थियो । यसअघि एसएसपीमा कुँवर १३ औँ नम्बरमा रहनुभएको थियो । कुँवरका दाई बाबुराम नेपाली कांग्रेस नेतृत्वको देउवा सरकारका बेला महान्यायधिवक्ता बन्नुभएको थियो ।