सिक्किममा हिमपहिरो : तीन नेपालीसहित ७ जनाको मृत्यु, १३ जना घाईते

काठमाडौं । भारतस्थित सिक्किममा हिमपहिरोमा परेर तीन नेपालीसहित सात जनाको ज्यान गएको छ । हिमपहिरोमा परेर अन्य १३ जना घाइते भएका छन् ।

अप्रिल ४ तारेख मङ्गलवार दिउँसो गान्तोक–नाथुला जेएनएम सडकमा गएको हिमपहिरोमा परेर चितवनका शिवप्रसाद लामिछाने र आशिका ढकाल तथा रुपन्देहीका मुना शाह श्रेष्ठको ज्यान गएको सिक्किम सरकारले विज्ञप्ति मार्फत पुष्टि गरेको हो । ज्यान गुमाउने अरू चार जना भारतीय नागरिक रहेका छन् ।

यस्तै घाइते १३ मध्ये तीन जना नेपाली रहेको बताइएको छ । गीता सापकोटा, ज्वोती गुरुङ र रमेश खनालको उपचार भइरहेको छ । हिमपहिरोमा चार सयभन्दा धेरै पर्यटक फसेको र उद्धार कार्य जारी रहेको जनाइएको छ ।