बझाङ दुर्घटना : सुदूरपश्चिमका कानूनमन्त्री सिंहसहित तीन जनाको मृत्यु !

काठमाडौं । सुदूरपश्चिमका आन्तरिक मामिला तथा कानूनमन्त्री पृथ्वीबहादुर सिंहको जीप दुर्घटनामा परेर निधन भएको छ । मन्त्री सिंहको कोहलपुर मेडिकल कलेज, नेपालगञ्जमा उपचारका क्रममा मृत्यु भएको प्रहरीले जानकारि दिएको हो ।

मंगलबार धनगढीबाट बझाङ जाँदै गरेको अवस्थामा मन्त्री सिंहको गाडी दुर्घटनामा परेको थियो । दुर्घटनामा परेर उहाँकी श्रीमती अमृतादेवी र भाउजु जानकीको घटनास्थलमा मृत्यु भएकोमा सिंहको उपचारको क्रममा ज्यान गएको हो । सुपप्र ०१००१ झ ४८० नम्बरको गाडी बझाङ केदारस्युँ गाउँपालिकाको धारछडा भन्ने ठाउँमा सडकबाट अन्दाजी ५० मिटर तल कालंगा खोला किनारमा खसेको थियो ।

मन्त्री सिंहलाई उपचारका लागि हेलिकोप्टरमा नेपालगञ्ज ल्याइएको भएपनि उपचारका क्रममा मृत्यु भएको थियो । मन्त्री सिंहका पीएसओ दीपक भण्डारी र चालक धर्मराज जोशीको अहिले पनि उपचार भैरहेको छ ।