संविधानसभा अध्यक्ष नेम्वाङको बिहिबार राजकीय सम्मानसहित अन्त्यष्टि, दिइयो सार्वजनिक बिदा !

काठमाडौं । सरकारले संविधानसभाका अध्यक्ष एवम् नेकपा एमालेका उपाध्यक्ष सुवासचन्द्र नेम्वाङको निधनको शोकमा भोली बिहीवार सार्वजनिक बिदा दिएको छ । गृह मन्त्रालयले मङ्गलवार एक सूचना जारी गर्दै शोक बिदा बारे जानकारी दिएको हो ।

विदेशमा रहेका दुबै छोराहरु स्वदेश फर्किएपछि बिहीवार अन्त्यष्टि गरिने परिवारको योजना अनुसार सरकारले सार्वजनिक बिदा दिएको छ । नेम्वाङको राजकीय सम्मानका साथ अन्त्यष्टि गरिने निर्णय समेत भएको छ । अन्त्यष्टिका दिन बिहिबार सबै सरकारी कार्यालय, विदेशमा रहेका नेपाली दूतावास र नियोगहरूमा सार्वजनिक बिदा हुने र ती कार्यालयहरूमा राष्ट्रिय झण्डा आधा झुकाइने छ।

नेम्वाङको सोमबार राति हृदयघातका कारण ७१ वर्षको उमेरमा निधन भएको थियो । मध्यराती साँढे १ आसपासमा घरमै बेहोस भएर ढलेका नेम्वाङलाई त्रिवि शिक्षण अस्पताल लगिएको भएपनि अस्पतालले बाटोमै मृत्यु भएको जनाएको थियो ।