स्कुले बालक बचाउन खोज्दा लुम्बिनी प्रदेशका अर्थमन्त्रीको गाडी दुर्घटना, मन्त्रीसहित ४ जना घाइते !

काठमाडौं, दाङ । लुम्बिनी प्रदेशका अर्थमन्त्री धनबहादुर मास्की सवार गाडी दुर्घटनामा परेको छ । सोमवार दिउँसो दाङको तुलसीपुर उपमहानगरपालिका–१२ सितलपुरको घुम्तीमा मन्त्री मास्की चढेको लु १ झ ७३८ नम्बरको गाडी चालकले सडकमा दौडिदैगरेका बालकलाई बचाउन झाडीमा हालेपछि दुर्घटनामा परेको हो ।

राप्ती राजमार्गअन्तर्गत तुलसीपुरबाट अमेलिया हुँदै मन्त्रालयतर्फ जाँदै गरेको गाडी दुर्घटनामा पर्दा अर्थमन्त्री मास्की, स्वकीय सचिव शम्भु पौडेल, पीएसओ मनबहादुर थिडी, चालक मनबहादुर बंशी मगर सामान्य घाइते हुनुभएको छ । अर्थमन्त्रीसहित चार जनाको राप्ती प्रादेशिक अस्पताल तुलसीपुरमा उपचार भइरहेको छ भने अन्यको अवस्था सामान्य रहेको प्रहरीले जानकारी दिएको छ ।

विद्यालय छुट्टी भएपछि दौडिएर घरतर्फ जान थालेका एक जना बालकलाई जोगाउनका लागि चालकले गाडी झाडी भएको खाल्डोमा हालेपछि दुर्घटनामा परेको थियो । बच्चा जोगाउनका लागि चालकले गाडी खाडलमा हाल्नुपरेको मन्त्रीका स्वकीय सचिव पौडेलले जानकारी दिनुभएको होे ।