टिकटक प्रतिवन्धको निर्णय पुनःविचार गर्ने प्रधानमन्त्री प्रचण्डको संकेत !

काठमाडौं । प्रधानमन्त्री पुष्पकमल दाहाल (प्रचण्ड)ले टिकटक प्रतिवन्धको निर्णय पुनःविचार गर्ने संकेत गर्नुभएको छ । सोमबार सिंहदरबारमा सम्पादकहरुसँगको भेटका क्रममा प्रधानमन्त्री प्रचण्डले टिकटकबाहेकका अन्य सामाजिक सञ्जाल अहिले केही नहुने बताउँनुभएको हो ।

सामाजिक सञ्जाल नियमनका लागि विधेयक ल्याउने तयारीमा रहेको जानकारी गराउदै प्रधानमन्त्री प्रचण्डले भन्नुभयो, ‘टिकटकबारे पनि पुनःविचार हुन्छ।’ अन्य सामाजिक सञ्जाल नियमन गर्नुपर्ने राय आएमा आफू तयार भएको प्रधानमन्त्री प्रचण्डको भनाइ थियोे । टिकटकबारे हरेकजसो राजनीतिक दलका बैठकमा कुरा हुने गरेको र सबैभन्दा बढी प्रतिपक्षी दलबाट कुरा आउने गरेको उहाँले सुनाउनुभयो । प्रमुख प्रतिपक्षी दलका नेता समेत रहनुभएका पुर्वप्रधानमन्त्री केपी शर्मा ओली र कांग्रेस सभापति शेरबहादुर देउवाले टिकटक कहिले बन्द गर्ने भनेर हरेक दिन सोध्ने गरेकाले केही गर्नुपर्छ भन्ने लागेर कदम चालेको प्रधानमन्त्री प्रचण्डले खुलासा गर्नुभयो ।

टिकटकले कतिपयलाई सकारात्मक सहयोग गरेपनि परिवार समाज सबैतिर देखिएको बेचैनी भने हटेको महशुस गरेको प्रधानमन्त्री प्रचण्डले बताउनुभयो । बन्द गरिहाल्नुपर्ने थियो र गरियो,एउटा तरंग पैदा गरेको कदम अब नयाँ शिराबाट अघि बढ्छ’ प्रधानमन्त्री प्रचण्डले भन्नुभयो ।