अध्यागमन अधिकृतमाथि हातपात गर्ने प्रहरी कर्मचारीको सरुवा, डीआईजी चन्दले जोगाइदिए जागिर !

काठमाडौं । त्रिभुवन अन्तर्राष्ट्रिय विमानस्थल भित्रै अध्यागमन अधिकृतमाथि हातपात गरेको अभियोग लागेका असईसहित तीन प्रहरी कर्मचारीलाई सरुवा गरेर निलम्बनको सिफारिसलाई रोकिएको छ । असई सञ्जय तामाङ र दुई जना सिपाहीलाई महानगरीय प्रहरी कार्यालय रानीपोखरी सुरुवा गरेको र यो पनि एक हदको कारबाही भएको प्रहरी अधिकारीहरुले जिकिर गरेका छन् ।

यसअघि अध्यागमन अधिकृत छायालाल मोक्तानमाथि हातपात भएपछि गृह मन्त्रालयले गठन गरेको सहसचिव थानेश्वर न्यौपाने संयोजकत्वको छानविन समितिले असई तामाङलाई निलम्बन गर्न सिफारिस गरेको थियो। उक्त सिफारिसपछि असन्तुष्ट जनाउँदै त्रिभुवन विमानस्थल प्रहरी प्रमुख अर्जुन चन्दले राजीनामा बुझाउनुभएको थियो । विमानस्थल सुरक्षाको नेतृत्व गरेका अधिकृतले आफु मातहतका सुरक्षा कर्मचारीको बचाउमा नैतिकता प्रदर्शन गरेको भन्दै डीआईजी चन्दको प्रशंसा समेत भएको थियो ।

प्रहरी प्रधान कार्यालयसँग छलफल भएपछि डीआई चन्द राजीनामा फिर्ता लिएर काममा फर्किनुभएको छ । छानबिन समितिले कारबाही सिफारिस गरिएका प्रहरी कर्मचारीलाई डीआईजी चन्दले नै पुरस्कृत गरेको भन्दै उनको फेरि पनि प्रशंसा भैरहेको छ । विमानस्थलका कर्मचारी र अध्यागमनका अधिकारीहरु भने प्रहरीको कदमले असन्तुष्ट बनेका छन्।