८ महिनामै नेपाल सरकारले थप्यो २ खर्ब १८ अर्ब बढी ऋण,प्रतिव्यक्ति ८१ हजार दायित्व !

काठमाडौं । चालु आव २०८०/८१ को आठ महिनासम्म सरकारले २ खर्ब १८ अर्ब ८६ करोड रुपैयाँ ऋण थपेको छ । योसँगै नेपालको सार्वजनिक ऋण २३ खर्ब ८८ अर्ब रुपैयाँ पुगेको छ ।

सार्वजनिक ऋण व्यवस्थापन कार्यालयका अनुसार फागुन मसान्तसम्म ११ खर्ब ८५ अर्ब आन्तरिक र १२ खर्ब २ अर्ब वाह्य ऋण पुगेको छ । सरकारले यस वर्ष ऋण तिर्नमात्र सवा १ खर्ब रुपैयाँ खर्च गरेको छ । यो दायित्वबाट विकास निर्माणमा खर्च हुनुपर्ने ठूलो बजेट ऋण तिर्न खर्च भएको छ । आन्तरिक ऋणको साँवा भुक्तानीमा मात्र १ खर्ब २ अर्ब र वाह्य ऋणको साँवा भुक्तानीमा २३ अर्ब ६ करोड रुपैयाँ खर्च भएको छ । अझ,फागुन मसान्तसम्म सरकारले सार्वजनिक ऋणको ब्याज भुक्तानीमा ४९ अर्ब ४६ करोड रुपैयाँ खर्च गरेको छ । आन्तरिक ऋणको ब्याज भुक्तानीमा ४३ अर्ब ६७ करोड र वाह्य ऋणको ब्याज भुक्तानीमा ५ अर्ब ७९ करोड रुपैयाँ चालू आवको ८ महिनामै खर्च भएको छ ।

ऋण काढेर खर्च धान्ने बाध्यतामा पुगेको सरकारले ५ महिनामा १ खर्ब ३१ अर्ब उठाएको छ । सार्वजनिक ऋण हिस्सा प्रतिव्यक्ति भाग लगाउँदा ८१ हजार ८ सय ८९ रुपैयाँ पुगेको छ । अघिल्लो महिना (माघ) सम्म प्रतिव्यक्ति ऋणको दायित्व ८१ हजार ८ सय ३७ मात्रै थियोे ।