विदेशमा अलपत्र नागरिकलाई सरकारकै खर्चमा उद्दार, कोरोनादेखि शिक्षक आन्दोलनसम्मका खबर

काठमाडौं– सरकारले विदेशमा अलपत्र परेका नेपालीहरुलाई सरकारकै खर्चमा स्वदेश फर्काउने भएको छ । सरकारले नेपालमै उत्पादन गर्न सक्ने औषधि विदेशबाट खरिद गरिरहेको बेला नेपालमै उत्पादन गर्न सकिने औषधि विदेशबाट खरिद गर्न रोक लगाउन माग गरिएको छ । कोभिडकै निहुँमा तलब रोक्का मात्र होइन निजि विद्यालयहरूले कार्यरत तीन सय शिक्षकहरू बेरोजगार बनेका छन् । बिहिबार थप १ सय ६७ जना संक्रमितलगायत खबरहरुले आज प्राथमिकता पाएका छन् ।

विदेशमा अलपत्र परेकालाई सरकारी खर्चमा नेपाल ल्याइने
सरकारले विदेशमा अलपत्र परेका नेपालीहरुलाई सरकारकै खर्चमा स्वदेश फर्काउने भएको छ । कोभिड—१९ का कारण विदेशमा अलपत्र परेका नागरिकहरु अब सरकारी खर्चबाट स्वदेश फर्किन पाउने निर्णय विहिबार गरेको हो । अलपत्र नागरिकलाई फिर्ता ल्याउने बनेको कार्यविधि २०७७ पारित भएको छ । योसँगै सरकारी खर्चमा अलपत्र नागरिक फर्किन पाउने छन् । कोरोनाका कारण
अलपत्र नागरिकलाई वैदेशिक रोजगारी प्रवर्दधन कोषको रकमबाट स्वदेश फिर्ता ल्याउने निर्णय भएको सरकारका प्रवक्ता डा. युवराज खतिडाले जानकारी दिए । उनका अनुसार अलपत्र परेकालाई ल्याउने कार्य आइतबारदेखि सुरु हुनेछ ।

नेपालमै उत्पादन गर्न सकिने औषधि विदेशबाट नल्याउन माग
सरकारले नेपालमै उत्पादन गर्न सक्ने औषधि विदेशबाट खरिद गरिरहेको बेला नेपालमै उत्पादन गर्न सकिने औषधि विदेशबाट खरिद गर्न रोक लगाउन माग गरिएको छ । नेपाल औषधि उत्पादन संघ आन्दोलनमै उत्रिएर सरकार समक्ष यस्तो माग राखेको हो । संघले नेपालमा उत्पादन हुने औषधिहरु विदेशबाट ल्याउन बन्द गर्न माग गर्दै निरन्तर आन्दोलन गर्ने जनाएको छ । असार २२ गते सेनिटाइजर दर्ताको म्याद तीन महिना थप्ने निर्णय गरेसँगै औषधि उत्पादक संघ आन्दोलनमा उत्रेको थियो । देशलाई अर्थतन्त्रमा आत्मनिर्भर बनाउने नीति लिएको सरकारले त्यसलाई कार्यान्वयनमा पनि लैजानुपर्ने संघका महासचिव विप्लव अधिकारीले बताए ।

तलब नदिए आत्मदाह गर्छौं–निजी विद्यालयका शिक्षक
सरकारले कोभिड–१९ संक्रमणका कारण देखाएर निजी विद्यालय संचालकहरूले त्यहाँ कार्यरत शिक्षकहरूको तलब विगत ६ महिनादेखि निकासा बन्द गरेपछि निजी विद्यालयका शिक्षक आन्दोलित बनेका छन् । कोभिडकै निहुँमा तलब रोक्का मात्र होइन निजि विद्यालयहरूले कार्यरत तीन सय शिक्षकहरू बेरोजगार बनेका छन् । आफूहरु बेराजगार बनेपनि बुधबार र बिहिबार उनीहरुले काठमाडौंको माएतीघरमा प्रदर्शन गरेका छन् । ती शिक्षकहरूलाई समेत विद्यालयबाट निस्कासन गरेका छन् । निजी विद्यालय संचालकहरूले अब पनि तलब निकासा नदिए शिक्षा मन्त्रालय परिसरमै गएर आत्मदाह गर्ने चेतावनी संस्थागत विद्यालयका पिडित शिक्षकहरूले दिएका छन् ।

थप १ सय ६७ जना संक्रमित थपिए
पछिल्लो २४ घण्टामा देशका विभिन्न प्रयोगशालामा गरिएको ४ हजार ९८१ जनामा पिसीआर परीक्षणमा १६७ जना संक्रमित थपिएका छन् । स्वास्थ्य तथा जनसंख्या मन्त्रालयले कोरोना अपडेटबारे बिहीबारको नियमित प्रेस ब्रिफिङमा यस्तो जानकारी दिएको हो । योसँगै नेपालमा कोरोना संक्रमितको संख्या १७ हजार ३४४ जना पुगेको छ । आज काठमाडौंका १ जनामा संक्रमित थपिएका छन् ।
मन्त्रालयका अनुसार बिहीबार देशभर २३ हजार ५०० जना क्वारेन्टाइनमा रहेका छन् । त्यस्तै कुल ६ हजार ५६ जना आइसोलेसनमा उपचाररत रहेका छन् । आज २१३ जना डिस्चार्ज भएका छन् । योसँगै नेपालमा डिस्चार्ज हुनेको संख्या ११ हजार २४९ जना पुगेको छ । नेपालका ७७ जिल्लामा कोरोना भाइरसको संक्रमण फैलिएको छ । आजसम्म ३९ जनाको मृत्यू भएको छ ।

यातायात कार्यालयमा घुस माग्ने पक्राउ
चन्द्रागिरी नगरपालिका–१० गुर्जुधारास्थित यातायात व्यवस्था कार्यालय परिसरमा सेवाग्राहीलाई हैरानी दिएको अभियोगमा ४ जनालाई बुधबार दिउँसो प्रहरीले पक्राउ गरेको छ ।

पक्राउ पर्नेहरुमा ओखलढुंगा चम्पादेबी गाउँपालिका९४ घर भएका ३० वर्षीय पुष्कर कटुवाल, धनुषा हरीहरपुर गाउँपालिका–७ घर भएका ३० वर्षीय बिमल लामा, धादिङ बेनीघाट रोराङ गाउँपालिका–६ घर भएका २६ वर्षीय बिनोद पुलामी र लमजुङ मर्स्याङदी गाउँपालिका–२ घर भएका २६ वर्षीय उज्जवल गुरुङ रहेका छन ।
उक्त कार्यालय क्षेत्रमा यातायात कार्यालय जाने सेवाग्राहीलाई छिटो काम सम्पन्न गरिदिन्छु भनी सार्वजनिक सडकमै सर्वसाधारण सेवाग्राहीलाई हैरानी दिइरहेको अवस्थामा महानगरीय प्रहरी वृत्त थानकोटबाट खटिएको प्रहरीले उनीहरुलाई पक्राउ गरेको हो ।