कोरोना संक्रमित हास्यकलाकार मनोज गजुरेलको फोक्सोमा समस्या, आईसीयूमा उपचार हुँदै

काठमाडौं । कोरोना संक्रमण देखिएका बरिष्ठ हास्यकलाकार मनोज गजरेलको बलम्बुस्थित सशस्त्र प्रहरी अस्पतालमा आईसीयूमा राखेर उपचार थालिएको छ । लक्सिजनको लेभल कम भएर बिहिबार अस्पताल लगिएका गजुरेलको फोक्सोमा समस्या देखिएपछि आइसीयूमा राखेर उपचार गरिएको हो ।

अस्पताल जानुपूर्व गजुरेलले फेसबुकमा स्टाटस लेखेर आफूलाई पूर्ण सुधार नभएको र र शरीरले फरक फरक प्रतिक्रिया देखाइरहेको जानकारी गराउनुभएको थियो । अस्पतालमा स्वास्थ्य परिक्षणपछि उनको फोक्सोमा पानी जमेको चिकित्सकहरुले बताएका छन् । गजुरेलका निकट हास्यव्यंग्य कवि लक्ष्मण गाम्नाङेले अवस्था धेरै गम्भिर नरहेको जानकारी दिनुभएको छ । चिकित्सकले धेरै ठूलो समस्या होइन तर सामान्य पनि होइन, ठिक हुन्छ भन्दै प्रतिक्रिया दिएका छन् ।

गजुरेललाई गत १० कात्तिकमा कोरोना संक्रमण पुष्टि भएको थियो । हास्यकलाकार गजुरेलले फेसबुकबाट आफूलाई कोभिड १९ पोजिटिभ देखिएको जानकारी गराउनुभएको थियो । उनी केही दिनसम्म घरमै आइसोलेसनमा बस्नुभएको थियो ।