यूएईको नेपाली दूतावासका कर्मचारीमा कोरोना संक्रमण, हुलाक तथा कुरियर सेवाबाट सुविधा लिन आग्रह

काठमाडौं । संयुक्त अरब इमिरेट्स (यूएई) स्थित नेपाली दूतावासका अधिकांश कर्मचारी कोरोना सङ्क्रमित बनेका छन् । दूतावासले एक बिज्ञप्ति जारी गर्दै कोभिड–१९ बाट दूतावासका अधिकांश कूटनीतिक तथा स्थानीय कर्मचारी संक्रमित भएको जानकारी गराएको हो ।

कर्मचारीहरुलाई कोरोना संक्रमण भएपछि दूतावासले राहदानीका लागि आवेदन दिँदा हुलाक तथा कुरियर सेवाको प्रयोग गर्न अनुरोध गरेको छ । सेवाग्राहीको सुविधा र सुरक्षालाई मध्यनजर गर्दै दूतावासबाट प्रदान गरिने सेवालाई प्रभाव नपरोस् भनेर राहदानी नवीकरणको लागि हुलाकमार्फत आवेदन संकलन गरिएको दूतावासले जनाएको छ । आगामी फागुन २ गते लागू हुनेगरी हुलाक तथा कुरियर सेवाको माध्यमबाट आवेदन पठाउन विज्ञप्तीमा भनिएको छ ।

राहदानीको लागि फाराम भर्ने, राजस्व तिर्ने तथा साथमा पठाउनुपर्ने कागजातहरुको सम्बन्धमा दूतावासको वेभसाइट हेर्न भनिएको छ । कर्मचारीहरु कोरोना संक्रमित भएकाले आउँदो फागुन दुई गतेसम्म भौतिक सम्पर्क कम हुनेगरि सेवा प्रवाह हुने जानकारी गराइएको छ ।