एजेन्सी । प्रजातान्त्रिक गणतन्त्र कंगोमा इटालीका राजदूतको हत्या भएको छ । सोमबार स्थानीय समयानुसार बिहान १० बजेर १५ मिनेट भएको एक हमलामा इटालियन राजदूत लुका अटानासियो मारिएका हुन् ।
हमला लगत्तै अस्पताल लगिएका राजदूत अटानासियोलाई चिकित्सकले मृत घोषणा गरेका छन् । पूर्वी कंगोमा संयुक्त राष्ट्रसंघको एउटा टोलीमा सामेल उहाँ विश्व खाद्य कार्यक्रमसँग आवद्ध रहनुभएको थियो । उक्त टोलीमा सहभागी इटालीका एक प्रहरी अधिकारी समेतको मृत्यु भएको छ । कंगोको विदेश मन्त्रालयले उक्त घटनाको पुष्टि गर्दै घटनाप्रति दुःख प्रकट गरेपनि हमलामा कसको संलग्नता छ भन्ने प्रस्ट हुन सकेको छैन । ४३ वर्षीय राजदूत अटानासियो सन् २०१७ देखि कंगोमा कार्यरत हुनुहुन्थ्यो ।
कयौं वर्ष गृहयुद्ध झेलेको कंगोमा सन् १९९४ देखि २००३ बीचको अवधिमा करिब ५० लाख मानिसको मृत्यु भएको थियो । देशको पूर्वी क्षेत्रमा अझै पनि दर्जनौं सशस्त्र समूह क्रियाशील रहेका कारण हिंसात्मक घटनाले निरन्तरता पाउँदै आएका छन् ।
लाइभ न्युज
तपाईको प्रतिक्रिया