इजरायलस्थित रब्बीको समाधीस्थलमा भागदौड, कम्तिमा ३८ जनाको मृत्यु

एजेन्सी । इजरायलमा हासिडिक यहुदी पर्वका बेला भएको भागदौडमा परेर कम्तीमा ३८ जनाको मृत्यु भएको छ । उत्तरपूर्वी इजरायलको माउन्ट मेरोनमा एक जना प्रसिद्ध रब्बीको समाधीस्थलमा भएको कार्यक्रममा शुक्रबार भागदौड मच्चिदा ३८ बढीको मृत्यु भएको हो । उक्त धार्मिक कार्यमा एक लाख बढी मानिस सहभागी भएको बताइएको छ ।

नाचगान चलिरहेका बेला एक्कासी भागदौड मच्चिदा सयौं घाइते भएको जनाइएको छ । स्थानीय अधिकारीहरुले मृत्यु हुनेको आधिकारिक संख्या भने जानकारी गराएका छैनन । दोस्रो शताब्दीका रब्बी सिमोन बार एचाईको सम्झनामा हरेक वर्ष हजारौं अर्थोडक्स यहुदीहरू उक्त ठाउँमा भेला हुने गर्दछन् । भेला भएकाहरूले रातभरि आगो बालेर नाचगान गर्ने प्रचलन रहदैआएको छ ।।