Techie IT
Fri, September 24, 2021  |   शुक्रबार, अशोज ८, २०७८

Grow your business

गृहपृष्ठ » Breaking News » चार्टर्ड उडानबाट नेपाली नागरिक समेत विदेश जान पाउने, भिसा सेवा भने बन्द

चार्टर्ड उडानबाट नेपाली नागरिक समेत विदेश जान पाउने, भिसा सेवा भने बन्द


175 Views

काठमाडौं । निषेधाज्ञामा अनुमति दिइएका अन्तर्राष्ट्रिय चार्टर्ड उडानमा अलपत्र विदेशीसँगै नेपाली पनि जान पाउने भएका छन् । संस्कृति, पर्यटन तथा नागरिक उड्डयन मन्त्रालयले बुधबार मात्रै जो सुकै नेपाली नागरिक पनि चाटर्डमार्फत अन्य मुलुक जान सक्ने निर्णय गरेको हो ।

मन्त्रालयका सह–प्रवक्ता प्रेम सुवेदीले यो निर्णयसँगै खाडी मुलुक जान ठिक्क परेका युवा चार्टर्ड फ्लाइटमा जान सक्ने बताउनुभयो । यसअघि पनि खाडी मुलुकका कामदारबाहेक अन्य देश जाने नेपाली वा एनआरएनएलाई प्रक्रिया पूरा गरेर आएको खण्डमा चार्टर्ड फ्लाइटमा जान रोकिएको थिएन् । नेपालमा कोरोनाको दोस्रो लहर फैलिएसँगै अहिले नेपालमा रहेका कूटनीति नियोग, नेपाल घुम्न आएका पर्यटक, एनआरएनए, यूरोप अमेरिकालगायतका मुलुक जाने नेपाली नागरिकले जहाज चाटर्ड गरेर गइरहेका छन् ।

नेपालबाट चार्टर्डमार्फत जान चाहने विदेशी नागरिक, गैरआवसीय नेपाली तथा नेपाली नागरिक भनेर नछुट्याइएकाले सबैले जान पाउँने तर, जाने नागरिकले सबै प्रक्रिया भने पूरा गरेको हुनुपर्नेछ । अध्यागमन विभागका निर्देशक तथा सूचना अधिकारी झंकनाथ ढकालका अनुसार अहिले युएई र कुवेतका लागि जाने नागरिकलाई भिसा दिइएको छैन । ती मुलुकभन्दा बाँकी रहेका अन्य मुलुकमा जाने विदेशी वा नेपाली नागरिकले प्रक्रिया पूरा गरेर आएको खण्डमा अध्यागमनले सहजिकरण गर्दैआएको छ । बिहिबारबाटै अध्यागमनको अत्यावश्यक सेवा भने बन्द गरेको छ ।

विदेशीहरू धमाधम फर्किँदै
उद्धार उडानमा जाने यात्रुमा अधिकांश विदेशी नागरिक रहेको पर्यटन बोर्डले जानकारी दिएको छ । आइतबारमात्रै पर्यटन बोर्डको सहकार्यमा कतार एयरवेजबाट अमेरिकी र युरोपियन नागरिक गएका थिए । हिमालय एयरलाइन्सले बंगलादेशीलाई लगेको छ भने रुसले आफ्ना १२८ नागरिक लैजान रुसी एयरलाइन्स एरोफ्लट नेपाल आउँदैछ । बिहीबार स्पेनले आफ्ना नागरिकलाई वाइडबडीमार्फत स्वदेश लगेको छ । यस्तै, अमेरिकी र यूरोपका नागरिक पठाउनका लागि जेठ ८ र ११ गतेलाई कतारका लागि चार्टर्ड उडानको अनुमति दिइएको छ । विभिन्न जिल्लामा अलपत्र ४८४ पर्यटकलाई बोर्डले सहजीकरण गरेर काठमाडौं ल्याइसकेको छ । यीमध्ये ५४ अमेरिकी नागरिक छन् । उनीहरूलाई ५ दिन होटल क्वारेन्टाइनमा राखेर सम्बन्धित दूतावासको समन्वयमा पठाइने बताइएको छ ।

अध्यागमनबाट सबैप्रकारको भिसा सेवा बन्द
कोरोनाभाइरसको नयाँ प्रजातिको संक्रमणमा वृद्धि भएको उल्लेख गर्दै अध्यागमन विभागले बिहिबारदेखी सबै प्रकारको भिसा सेवा बन्द भएको जानकारी गराएको छ । तर, लकडाउनको कारण नेपालमा अलपत्र परेका विदेशी, कारागारबाट सुपुर्दगी गर्नुपर्ने र देश निकाला गर्नुपर्ने, पासपोर्ट प्रक्रियाले रोकिएका र अन्य अत्यावश्यकीय कामले रोकिएकालाई भने भिसामा सहजीकरण गरिने छ । भिसा भएर पनि जान नपाएकालाई त्रिभुवन अन्तर्राष्ट्रिय विमानस्थलले सहजीकरण गर्ने जनाइएको छ ।

क्याटेगोरी : Breaking News, International, Nepal, News



प्रतिक्रिया दिनुहोस

-Advertisement-