अष्ट्रेलियाले नेपाललाई दियो १८ लाख डलरको स्वास्थ्य सामाग्री

काठमाडौं । अष्ट्रेलिया सरकारले नेपाली सेनालाई कोभिड–१९ महामारीविरुद्धको लडाइँका लागि १८ लाख डलरको स्वास्थ्य सामाग्री सहयोग गरेको छ । अष्ट्रेलियन सेनाको विशेष विमानले काठमाडौं ल्याएको स्वास्थ्य सामग्री नेपालका लागि अष्ट्रेलियन राजदूत फेलिसिटी भल्कले नेपाली सेनाका बलाधिकृत रथी प्रभुराम शर्मालाई हस्तान्तरण गर्नुभएको हो ।

बलाधिकृत रथी शर्माले अस्ट्रेलियाले गरेको सहयोगप्रति हार्दिक आभारसहित धन्यवाद प्रकट गर्नुभयो । यस्तै राजदूत भल्कले पनि कोभिड–१९ महामारीमा अग्रपङ्क्तिमा कार्यरत नेपाली सेनालाई वेष्टर्न अस्ट्रेलिया सरकारले प्रदान गरेको १८ लाख डलरको सामाग्रीहरु हस्तान्तरण गर्न पाउँदा खुशी लागेको प्रतिक्रिया दिनुभएको छ । अस्ट्रेलियाली वायुसेनालाई सहयोग सामाग्री दक्षिण एसियामा ल्याईदिएकोमा राजदूत भल्कले धन्यबाद दिनुभएको थियो ।