Techie IT
Monday August 2, 2021  |   सोमवार, साउन १८, २०७८
गृहपृष्ठ » Australia » साउथ अष्ट्रेलियाको बहुसांस्कृतिक आयोगमा नेपाली चेली

साउथ अष्ट्रेलियाको बहुसांस्कृतिक आयोगमा नेपाली चेली


522 Views

सरल गुरुङ, ब्रिजवेन
साउथ अष्ट्रेलियाको बहुसांस्कृतिक तथा जातजाति मामिला आयोगको सदस्यमा नेपाली चेली नियुक्त हुनुभएको छ ।
जुलाई १ तारिखमा साउथ अष्ट्रेलियन सरकारले जारी गरेको घोषणा अनुसार एडिलेडकी सामाजिक अभियन्ता मन्जु खड्का आयोगको सदस्यमा नियुक्त हुनु भएको हो । एक आयुक्त र १४ सदस्य रहने यो आयोगले राज्यको बहुसांस्कृतिक समाज र जातजातिका बारेमा प्रिमियर तथा प्रिमियरको सहायकमन्त्रीलाई प्रतिवेदन बुझाउने काम गर्दछ । यो आयोगले साउथ अष्ट्रेलिया राज्यका जातजातिको विविधतालाई प्रवर्धन गर्ने तथा बहुसांस्कृतिक समुदायका हकहित र मामिलाका बारेमा सरकार र अन्य सार्वजनिक निकायलाई सुझाव दिने काम गर्दछ ।
जुलाई १ तारिखदेखि नियुक्त भएका आयोगका पदाधिकारीहरुको कार्यकाल तीन वर्षको हुनेछ । आयोगको सदस्यहरुले प्रिमियरको नजिक रहेर काम गर्दछन् ।
आयोगको पदाधिकारीका लागि साउथ अष्ट्रेलियन सरकारले बहुसांस्कृतिक समुदायका मानिसहरुबाट खुल्ला आवेदन माग गरेको थियो । आवेदकको पृष्ठभूमि, उनीहरुले समाजमा पुर्याएको योगदान तथा व्यक्तित्व मुल्यांकन गरेर सदस्यमा नियुक्त गरिएको हो ।

नेपाली समाजको प्रतिनिधित्व गर्दै आयोगमा नियुक्त हुन पाउदा गर्व लागेको खड्काले नेपालट्युबलाई बताउनुभयो । विभिन्न समाजिक संघ संस्थामा सक्रिय रहनुभएकी खड्काले अब आफ्नो जिम्मेवारी सिंगो बहुसांस्कृतिक समुदायका हकहित र अधिकारलाई सुनिश्चित गर्नतर्फ केन्द्रित रहने समेत बताउनुभयो ।
छिट्टै नेपाली समाजसंग छलफल गरेर सरकारसंग रहेको अपेक्षा र चुनौतीका बारेमा जानकारी लिने समेत खड्काको तयारी छ ।

को हुन् मन्जु खड्का

साउथ अष्ट्रेलियाको नेपाली समाजमा मन्जु खड्का चिनिएको नाम हो । खासगरी नारी निकुञ्ज साउथ अष्ट्रेलियाकी संयोजक समेत रहनु भएकी खड्काले सामाजिक सेवामा आफुलाई समपर्ण गर्दै आउनु भएको छ । नेपालमा १५ वर्षसम्म विभिन्न सामाजिक संघसंस्थामार्फत महिला शसक्तिकरणमा जुट्नु भएकी मन्जु अष्ट्रेलियामा आएर समेत सामाजिक कार्यमा सक्रिय हुनुहुन्छ । नेपाली विद्यालय साउथ अष्ट्रेलियाकी संस्थापक प्रधानाध्यापक समेत रहनु भएकी मन्जु नेपाली समुदाय बाहेक अन्य बहुसांस्कृतिक समुदायमा समेत उत्तिकै सक्रिय हुदै आउनुभएको छ ।
स्थानिय मेरियन काउन्सिलको सामुदायिक नेतृत्व विकासको गतिविधीमा समेत काम गर्दै आउनु भएको छ । त्यस्तै केही वर्षदेखि बहुसांस्कृतिक महिला फोरमहरुमा समेत मन्जु सक्रिय हुनुहुन्छ । एक छोराकी आमा मन्जु पेशाले रजिष्टर्ड नर्सका रुपमा समेत कार्यरत हुनुहुन्छ ।

क्याटेगोरी : Australia, Breaking News, Breaking News, News
ट्याग : #manju khadka, #nari nikunja, #South Australia


प्रतिक्रिया दिनुहोस

-Advertisement-