कामदारको श्रम शोषण गर्ने दुइ जना सिड्नीबाट पक्राउ, मानव बेचबिखनको मुद्दा दर्ता

सिड्नी/आफ्नो क्याफेमा काम गर्ने कामदारलाई दुव्र्येवहार गर्ने तथा कम पारिश्रमिक दिएर श्रम शोषण गरेको आरोपमा सिड्नीमा एक महिला र एक पुरुष समातिएका छन् । अष्ट्रेलियन फेडरल पुलिस एएफपीले वेष्टर्न सिड्नीबाट उनीहरुलाई पक्राउ गरि मानव बेचबिखन र श्रमशोषणको मुद्दा लगाएको हो । सन् २०१८ मा कामदारले फेयर वर्क एमबुड्सम्यानमा आफुमाथी श्रम शोषण भएको उजुरी गरेका थिए ।

त्यहि उजुरीका आधारमा एएफपीले अपरेसन सिल्भरबोल्ट सुरु गरेको थियो । अनुसन्धानका क्रममा ५९ वर्षिय ती पुरुष साहुजीले आफ्ना कामदारलाई तथानाम गाली गर्ने, देश निकाला गरिदिने धम्की दिने, कामदारहरुको मोवाइल फोनको निगरानी गर्ने तथा राहदानी कब्जा गर्ने गरेको भेटिएको थियो । ती साहुजीले कामदारलाई आफ्नो समुदायबाट अलग राख्ने कसैसंग सम्पर्क गर्न नदिने, तोकिएभन्दा कम पारिश्रमिक दिने तथा खानाका लागि पनि तड्पाउने गरेको अनुसन्धानमा भेटिएको एएफपीले जनाएको छ । प्रहरीले कामदारमाथी भएको शोषणको प्रत्यक्षदर्शीहरुको बयानसमेत संकलन गरिसकेको छ । प्रहरीले केही दिन अघि अभियुक्तहरुको घर र क्याफेमा छापा मारेर केही थान मोवाइल र आर्थिक कागजपत्रहरु बरामद गरेको छ । साहुजी तथा कामदारको राष्ट्रियता बारे प्रहरीले खुलाएको छैन ।