टी-२० विश्वकप क्रिकेट : उपाधिका लागि भारत र दक्षिण अफ्रिका भिड्दै

काठमाडौं । वेस्ट इन्डिज र अमेरिकामा जारी आईसिसी टी-२० विश्वकपको उपाधिका लागि भारत र दक्षिण अफ्रिका भिड्ने भएका छन् । बिहीबार राति भएको दोस्रो सेमिफाइनलमा भारतले इङ्ल्यान्डलाई ६८ रनले पराजित गरेर दक्षिण अफ्रिकासँगको भेट पक्का गरेको हो ।

गएरातिको खेलमा भारतबाट १७२ रनको लक्ष्य पाएको इङ्ल्यान्ड १६.४ ओभरमा १०३ रनमा अलआउट भएको थियो । पहिलो सेमिफाइनलमा बिहीबार बिहान अफगानिस्तानलाई ९ विकेटले हराएर दक्षिण अफ्रिकाले फाइनलमा स्थान बनाएको छ । दक्षिण अफ्रिका पहिलोपटक फाइनल पुगेको हो ।

भारत सन् २००७ मा आयोजित पहिलो संस्करणको टी-२० विश्वकप विजेता हो । त्यसयता भारत यो प्रतियोगितामा उपाधिविहिन रहदै आएको छ । जारी संस्करणको खेल र हेड टु हेडको नतिजामा दक्षिण अफ्रिका भन्दा भारतीय टिम बलियो देखिएको छ ।