मर्स्याङ्दी नदीमा बस खस्दा १८ भारतीय पर्यटकको निधन, १६ जनाको जीवितै उद्धार !

काठमाडौं । शुक्रबार बिहान पोखराबाट काठमाडौंका लागि छुटेको यूपी ५३ एफटी ७६२३ नम्बरको बस तनहुँको ऐनापहरा भन्ने स्थानबाट मर्स्याङ्दी नदीमा खस्दा १८ जनाको मृत्यु भएको छ । दुर्घटनास्थलबाट १६ घाइतेको उद्धार गरिएको छ ।

मस्र्याङ्दी नदिमा खसेको बसबाट उद्दार गरिएका घाइतेलाई नेपाली सेनाको हेलिकप्टर पठाएर थप उपचारका लागि काठमाडौं ल्याइएको छ । नेपाली सेनाका प्रवक्ता तथा सहायक रथी गौरव कुमार केसीले सेनाको हेलिकप्टर दुर्घटनास्थल पुगेर गम्भिर घाइतेलाई काठमाडौं ल्याइएको जानकारि दिनुभयो । भीर भएका कारण तुइन रोपको सहायताले बास्केट स्टेचरमार्फत घाइते र मृतकको शब सडकसम्म ल्याउने काम भएको थियो । उद्धारमा १० गोताखोरसहित सशस्त्र प्रहरीको ८० जनाको टोलीसँगै नेपाल प्रहरीको टोली समेत खटिएको थियो ।

बस सडकभन्दा करिब एक सय ५० मिटर तल मर्स्याङ्दी नदीमा खसेको थियो। ४१ जना भारतीय पर्यटक रहेको बस दुर्घटनामा परेर ६ जना हराइरहेको बताइएको छ । दुर्घटनाको कारण भने खुल्न सकेको छैन ।