भारी वर्षासँगै बाढी पहिरोको जोखिम, सतर्कता अपनाउन सबैमाझ अपिल
![](https://nepaltube.com.au/wp-content/uploads/2021/07/Jhari-Nirantar.jpg)
काठमाडौं । बाढी पूर्वानुमान महाशाखाले थप वर्षाको पूर्वानुमान बारे जानकारि गराउदै नदी किनारका क्षेत्रमा बस्ने र सो बाटो भएर यात्रा गर्नेहरुलाई उच्च सतर्कता अपनाउन अनुरोध गरेको छ । काठमाडौ,पाल्पा, स्याङ्जा र पश्चिम नवलपरासीमा सोमबार भारी वर्षा मापन गरेको जल तथा मौसम विज्ञान विभाग थप पानी पर्दा जोखिम हुनेतर्फ सबैलाई सचेत गराएको हो ।
सोमबार भारी वर्षा मापन
जल तथा मौसम विज्ञान विभागको मौसम पूर्वानुमान महाशाखाका अनुसार पाल्पाको अर्चले वर्षा मापन केन्द्रमा ६ घण्टाको अवधिमा १ सय ५ मिलिमिटर वर्षा रेकर्ड भएको छ । यसैगरी स्याङ्जाको पञ्चमुलमा ८० दशमलव २ र पश्चिम नवलपरासीको देउरालीमा ७१ दशमलव ६ मिलिमिटर वर्षा भएको छ । काठमाडौंका कपन,सुन्दरीजल र आसपासका क्षेत्रमा पनि भारी वर्षा भएको छ । यो वर्षाका कारण बाग्मती, धोबीखोला र विष्णुमती नदीमा बहाव बढेको छ । ६ घण्टाको अवधिमा कपनमा ४७ मिलिमिटर र सुन्दरीजलमा ४१ दशमलव २ मिलिमिटर वर्षा मापन भएको छ । काठमाडौकै पानीपोखरीमा २५ मिलिमिटर वर्षा भएको छ । सिन्धुपाल्चोकको बाँसखर्क केन्द्रमा ६ घण्टामा ४७ मिलिमिटर वर्षा रेकर्ड भएको छ ।
मौसम पूर्वानुमान महाशाखाले सोमबार र मंगलबार भेरी र पश्चिम सेती नदी किनारमा उच्च सतर्कता अपनाउन आग्रह गरेको छ । यस्तै,कोशी, नारायणी, कर्णाली, महाकाली र यसका प्रमुख सहायक नदीहरू साथै कन्काई, कमला, बाग्मती, पूर्वी राप्ती, पश्चिम राप्ती र बबई नदीको जलसतह बढ्ने सम्भावना रहेकोले नदी तटीय क्षेत्रका क्रियाकलापमा सतर्कता अपनाउन अनुरोध गरिएको छ । सोमबार कोशी, बाग्मती, लुम्बिनी र सुदूरपश्चिम प्रदेशका एक–दुई ठाउँमा ठूलो वर्षा, सोमबार राति लुम्बिनी र सुदूरपश्चिम प्रदेशका थोरै ठाउँ तथा कोशी, बाग्मती, गण्डकी र कर्णाली प्रदेशका एक–दुई ठाउँमा ठूलो वर्षाको सम्भावना रहेको पूर्वजानकारि सहित सचेत रहन आग्रह गरिएको छ ।
तपाईको प्रतिक्रिया