निर्वाचन प्रयोजनका लागि दल दर्ता गर्ने आज अन्तिम दिन

काठमाडौं । आगामी फागुन २१ मा हुने प्रतिनिधिसभा सदस्य निर्वाचन प्रयोजनका लागि दल दर्ता गर्ने आज अन्तिम दिन रहेको छ । मंसिरमा १ निर्वाचन प्रयोजनका लागि दल दर्ता खुलेपछि मंगलबार (हिजोसम्म) ८० वटा दल निर्वाचन आयोगमा निर्वाचन प्रयोजनका लागि दर्ता भएका छन् ।

आजसम्म निर्वाचन आयोगमा दर्ता हुने दलले आगामी फागुन २१ मा हुने चुनावमा भाग लिन पाउँछन् । पहिलो हुने निर्वाचित हुने निर्वाचन प्रणाली अन्तर्गत निर्वाचन आयोगले बनाएको तालिकामा आगामी माघ ६ मा उम्मेदवारको मनोनयन पत्र दर्ता गर्नुपर्नेछ । सोही दिन बेलुका उम्मेदवारको सूची प्रकाशन हुने तालिका छ। मनोनयन पत्र दर्ता भएका उम्मेदवारको विरोधमा उजुरी माघ ७ सम्म दिन पाइन्छ । माघ ८ मा मनोनयन पत्र र उजुरी उपर जाँचबुझ एवम् निर्णय निर्वाचन आयोगले गरेर पुन: उम्मेदवारको नामावली प्रकाशन गरिनेछ। माघ ९ मा उम्मेदवारको नाम फिर्ता लिन अन्तिम समय रहेकाले यसपछि अन्तिम नामावली प्रकाशन हुनेछ र उम्मेदवारलाई निर्वाचन चिह्न प्रदान गरिने निर्वाचन आयोगको चुनावी तालिका रहेको छ।