काठमाडौं । भक्तपुर र काभ्रेपलान्चोकको सिमाना क्षेत्र साँगामा दुई लेनको अन्डरपास निर्माण तीव्र गतिमा अघि बढिरहेको छ। अरनिको राजमार्ग अन्तर्गत सूर्यविनायक–धुलिखेल सडक विस्तार आयोजनाले निर्माण गरिरहेको अन्डरपासको कुल लम्बाइ १ हजार ११० मिटर रहेको छ।
अन्डरपासमा बनेपातर्फ १९० मिटर र भक्तपुरतर्फ ९०० मिटर एप्रोच सडक समावेश हुनेछ । अण्डरपासको उचाइ ६ मिटर र चौडाइ १०.५ मिटर रहनेछ। अन्डरपासभित्रै २० मिटरको पुल निर्माण गरिने सब–इन्जिनियर ज्ञानमान श्रेष्ठले जानकारी दिनुभएको छ । हालसम्म अन्डरपास निर्माणको करिब ४५ प्रतिशत काम सम्पन्न भइसकेको, फाउन्डेसन तथा सुपरस्ट्रक्चर निर्माणको काम भइरहेको बताइएको छ।
कुल १५.८ किलोमिटर लामो सूर्यविनायक–धुलिखेल सडकलाई दुई खण्डमा विभाजन गरी अहिले स्तरोन्नतिको काम भइरहेको छ। साँगा–धुलिखेल (८.३ किमी) र सूर्यविनायक–साँगा (७.५ किमी) सडकखण्डलाई छुट्टाछुट्टै ठेक्कामा विस्तार गरिएको छ। आयोजनाकी सूचना अधिकारी इन्जिनियर अञ्जु परियारले हालसम्म सूर्यविनायक–साँगा सडकखण्डको भौतिक प्रगति ४३ प्रतिशत पुगेको जानकारी दिनुभएको छ। सूर्यविनायक–धुलिखेल सडक आयोजनाको ठेक्का सम्झौता २०७९ पुस २४ गते भएको थियो।
सडक विस्तारका लागि ७.५ किलोमिटर लामो सूर्यविनायक–साँगा सडकखण्ड तीन अर्ब ८८ करोड ९३ लाख रुपैयाँमा र ८.४ किलोमिटर लामो साँगा–धुलिखेल सडकखण्ड चार अर्ब पाँच करोड ६४ लाख रुपैयाँमा ठेक्का सम्झौता गरिएको छ। आयोजनाको कामसक्ने सम्झौता अवधि २०८० पुस २३ गतेसम्म रहेकोमा म्याद थप गरेर २०८३ फागुन मसान्त सम्म पुर्याइएको छ। Photo- NPL
लाइभ न्युज
तपाईको प्रतिक्रिया