आज हिन्दु नारिहरुको महान पर्व हरितालिका तीज, घरमै सुरक्षित बसेर मनाउन राष्ट्रपति भण्डारीको आग्रह

काठमाडौं । भाद्र शुक्ल तृतीयाका दिनमा मनाइने हरितालिका तीज पर्व महादेवको पूजा आराधना गरी मनाइँदैछ । यो दिन व्रत बसी शिव–पार्वतीको पूजा उपासना गरेमा सुख, शान्ति र परिवारको कल्याण हुने धार्मिक विश्वास रहेपनि कोरोना महामारीले दोलखाका शिवालय बन्द रहदा पहिलो पटक घर–घरमा बसेर तीज मनाउनुपरेको छ ।

कोरोना भाइरस संक्रमणको जोखिमका कारण यस वर्ष तीजमा सामूहिक भेला हुन रोक लगाइएको छ । श्रीमानको अटल सौभाग्यको कामना, सन्तान प्राप्तिका लागि, अविवाहित केटी एवं केटाहरुले असल वर र बधु प्राप्तिका लागि पनि तीजको व्रत बस्ने शास्त्रीय मान्यता रहेको छ । मनोकामना पूर्ण गराउने र सम्पूर्ण परिवारको कल्याणका लागि तिजको व्रत बस्ने धार्मिक बिश्वासलाई हिन्दु नारिहरुले जेजस्ता अभाव र समस्यामा पनि निरन्तरता दिदै आएका छन् । तिजको अघिल्लो दिन व्रतालुहरुले मीठा–मीठा परिकार दरका रुपमा खाई भाद्र शुक्ल तृतियाका दिन व्रतका लागि पूर्व तयारी गर्छन् ।

विशेषगरी माइती एवं दाजुभाइले छोरीचेली, दिदीबहिनीलाई बोलाई दर खुवाउने प्रचलन भएपनि कोरोना महामारीर सरकारबाट जारी निषेधाज्ञका कारण घरमै सिमित हुनुपरेको छ । तीजको अवसरमा महिलाहरुले वर्षदिनभर आफूलाई परेका दुःख, पीर, मर्कालाई गीतका माध्यमबाट सार्वजनिक पनि गर्दछन् । तर यो बर्ष पार्टी प्यालेशमा हुने दरका कार्यक्रम र नाजगानका कार्यक्रम रोकिएका छन् । तृतीयाका दिन हरितालिका व्रत, चौथीका दिन गणेश भगवानको पूजा र पञ्चमीका दिन स्नान गरी अरुन्धती सहित सप्तऋषिको पूजा गरी तीज समापन हुन्छ ।

तीजको अवशरमा राष्ट्रपति विद्यादेवी भण्डारी, उपराष्ट्रपति नन्दबहादुर पुन र सभामुख कृष्णबहादुर महराले शुभकामना दिदै घरमै सुरक्षित बसेर मनाउन आग्रह गरेका छन् ।