नेपाल वायुसेवा निगममा सुधार, असारमा तिर्यो ४३ करोड ९ लाख किस्ता !
![](https://nepaltube.com.au/wp-content/uploads/2023/10/Nepal-airlines_Punya-pp.webp)
काठमाडौं । जहाज खरिदको किस्ता बापत असारमा नेपाल वायुसेवा निगमले ४३ करोड ९ लाख ५५ हजार २८१ रुपैयाँ भुक्तानी गरेको छ । निगमका अनुसार ऋण दायित्व मध्ये दुई न्यारोबडी जहाजको २०८१ असार महिनाको किस्ता बापत पूरा र वाइडबडी जहाजको आंशिक गरी ३१ असारमा ४३ करोड ९ लाख ५५ हजार २८१ रुपैयाँ भुक्तानी गरिएको हो।
पछिल्लो व्यवस्थापन आएसँगै निगमले २०८१ असारसम्म ५ अर्ब ७९ करोड ७६ लाख ४२ हजार २४९ रुपैयाँ किस्ता रकम भुक्तानी गर्न सफल भएको छ । निगमले कर्मचारी सञ्चय कोष र नागरिक लगानी कोषबाट ऋण लिएर अन्तर्राष्ट्रिय उडानका लागि दुई न्यारोबडी र दुई वाइडबडी जहाज खरिद गरेको थियो । कोरोना महामारीका कारण निगमको व्यापारमा प्रतिकूल असर परेको थियो । यो अवधिको ब्याजको हर्जाना र पेनल छुट गरी सहयोग गरिदिन दुवै कोषसँग निगमले अनुरोध गरेर असारमा भुक्तानी गरेको छ ।
किस्ता संख्या वृद्धि गरेर ऋण दायित्व भुक्तनीलाई सहजीकरण गरिदिन निगमले दुवै कोषलाई अनुरोध पत्र पठाएको जनाएको छ । निगमनको पत्राचार अनुसार कर्मचारी सञ्चय कोष र नागरिक लगानी कोषमा आवश्यक छलफल भएको समेत बताइएको छ ।
तपाईको प्रतिक्रिया