अष्ट्रेलियामा नर्सको तलब पाँचौं पटक वृद्धि

काठमाडौं/ अष्ट्रेलियाको अल्बानिज सरकारले एज्ड केयर क्षेत्रमा कार्यरत नर्सहरूको तलब पाँचौं पटक बढाएको छ। नयाँ तलब संरचना १ अगस्टदेखि लागू भएको हो।

सबैभन्दा सामान्य तहका दर्ता भएका नर्सको वार्षिक तलब ३६ हजार अष्ट्रेलियन डलरभन्दा बढी पुगेको छ। यसैगरी इनरोल्ड नर्सको तलब करिब ३२ हजार अष्ट्रेलियन डलर पुगेको जनाएको छ।

यो वृद्धि फेयर वर्क कमिसनले सञ्चालन गरेको ‘एज्ड केयर भ्याल्यु केश’ अन्तर्गत गरिएको हो। तलब वृद्धि कार्यान्वयनका लागि सरकारले हालसम्म करिब १८ अर्ब अष्ट्रेलियन डलर लगानी गरिसकेको जनाएको छ।

सरकारका अनुसार तलब वृद्धिले एज्ड केयर क्षेत्रमा देखिएको नर्स अभाव कम गर्न, दक्ष जनशक्ति टिकाइ राख्न तथा वृद्ध अष्ट्रेलियालीहरूले पाउने सेवाको गुणस्तर सुधार गर्न सहयोग पुग्ने अपेक्षा गरिएको छ।

सरकारले एज्ड केयर क्षेत्रमा काम गर्ने स्वास्थ्यकर्मीको योगदानलाई सम्मान गर्दै उनीहरूको पारिश्रमिकलाई थप प्रतिस्पर्धी बनाउने नीति अनुरूप तलब वृद्धि गरिएको जनाएको छ।