नेपालसहित करिब ६० देशमा अस्ट्रेलियाको भिसाका लागि बायोमेट्रिक्स सङ्कलन व्यवस्था

अस्ट्रेलियाले भिसा आवेदन प्रक्रियामा पहिचान प्रमाणीकरणलाई थप कडाइ गरेको छ।

अस्ट्रेलियाको गृह मन्त्रालयले आप्रवासन प्रणालीमा हुने ठगी रोक्न र आवेदकको पहिचान सुनिश्चित गर्न नेपालसहित करिब ६० देशमा बायोमेट्रिक्स सङ्कलन कार्यक्रम लागू गरेको जनाएको छ।

यो व्यवस्था हालै लाओस, मङ्गोलिया र भारतमा समेत विस्तार गरिएको छ। यसअन्तर्गत बायोमेट्रिक्स दिनुपर्ने सूचना प्राप्त गरेका भिसा आवेदकले तोकिएका केन्द्रमा पुगेर औँठाछाप र अनुहारको तस्बिर उपलब्ध गराउनुपर्नेछ।

अस्ट्रेलिया सरकारले यस व्यवस्थाबाट नक्कली पहिचानको प्रयोग रोक्न र भिसा आवेदन प्रक्रियालाई थप सुरक्षित तथा विश्वसनीय बनाउन सहयोग पुग्ने अपेक्षा गरेको छ।