अष्ट्रेलिया र नेपालबीच व्यापार तथा लगानी सम्बन्धी सम्झौता

काठमाडौं । अष्ट्रेलिया र नेपालबीच व्यापार तथा लगानी सम्बन्धी सम्झौता भएको छ । नेपालबाट परराष्ट्रमन्त्री एनपी साउद अष्ट्रेलिया पुग्नुभएको समयमा यस्तो सम्झौतामा हस्ताक्षर भएको हो ।

परराष्ट्रमन्त्री साउद र अस्ट्रेलियाली समकक्षी पेनी वोङको उपस्थितिमा अस्ट्रेलियाका लागि नेपालका राजदूत कैलाशराज पोखरेल र अस्ट्रेलियाका सहायक विदेशमन्त्री टिम वाट्सले सम्झौतामा हस्ताक्षर गर्नुभएको छ । सम्झौता पछि दुवै देशका परराष्ट्रमन्त्रीहरुले नेपाल र अस्ट्रेलियाबीचको मैत्रीपूर्ण सम्बन्ध थप उचाइमा पुर्याउन भुमिका खेल्ने विश्वास व्यक्त गर्नुभएको थियो । अष्ट्रेलियाली सहायक विदेशमन्त्री वाट्सले अस्ट्रेलिया र नेपालबीचको सम्बन्ध जनस्तरसम्म नै पुगेको दाबी गर्दै ट्वीटरमा लेख्नुभएको छ,– ‘अस्ट्रेलिया र नेपाल निकटका मित्रराष्ट्रहरू हुन् । हाम्रो सम्बन्ध जनस्तरसम्म गाँसिएको छ । हाम्रो देशमा नेपाली मूलका अस्ट्रेलियालीको समुदाय तीव्र रूपमा बढिरहेको छ ।’

वाट्सले गत वर्ष अष्ट्रेलियामा भेटिएको नेपालको प्राचिन मुर्ति ल्याउने क्रममा नेपाल भ्रमण गरेको विषयलाई स्मरण गराउँदै नेपाल–अष्ट्रेलिया सम्बन्ध थप उचाईमा पुगेको बताउनुभएको थियो । उक्त भ्रमणका क्रममा समेत परराष्ट्रमन्त्री साउदसँग भएको भेटवार्तामा दुवै देशबीचको आर्थिक सम्बन्ध थप गहिराई पुर्याउने विषयमा छलफल गरेको उहाँले स्मरण गराउनुभयो ।