काठमाडौं । नेपाल पर्यटन बोर्डमा आजबाट ३ दिने ड्रोन फोटो प्रदर्शनी सुरु भएको छ । फोटो पत्रकार नबिन बाबु गुरुङको एकल ड्रोन फोटो प्रदर्शनीमा नेपालको विभिन्न भू–भागमा रहेका पर्यटकीय सम्भावना बोकेका तर चर्चामा नआएका गाउँ–बस्ती, प्राकृतिक दृश्य तथा मौलिक चाडपर्वहरू झल्किने तस्बिरहरू राखिएका छन् ।
चराहरूले देख्ने दृष्टिकोणबाट विभिन्न पर्यटकीय क्षेत्रहरू कस्तो देखिन्छन् भन्ने अवधारणामा आधारित रहेर तस्बिरहरू प्रस्तुत गरिएका छन् । नेपालका विभिन्न जिल्लामा रहेका पर्यटकीय गन्तव्य तथा प्रचार प्रसारको पर्खाइमा रहेका स्थानहरुको आकाशबाट देखिने दृश्य प्रस्तुत गर्न प्रदर्शनीको आयोजना गरिएको फोटो पत्रकार गुरुङ्ले बताउनुभएको छ ।
नेपाल पर्यटन बोर्डसंगको सहकार्यमा पिजे क्लब नेपाल र तमु सञ्चाकर्मी संघ नेपालले प्रदर्शनीको आयोजना गरेका हुन् । नेपालमा ड्रोन प्रविधिबाट खिचिएका तस्बिरहरूको यस्तो प्रदर्शनी पहिलो पटक भएको हो । यसले नेपाली पर्यटनका नयाँ आयाम उजागर गर्दै आन्तरिक तथा बाह्य पर्यटक आकर्षणमा टेवा पुग्ने अपेक्षा गरिएको छ। प्रदर्शनी आइतवारसम्म चल्नेछ ।
लाइभ न्युज
तपाईको प्रतिक्रिया