ठूलो परिमाणको विदेशी मुद्रासहित स्विडिस नागरिक पक्राउ

काठमाडौं । ठूलो परिमाणको विदेशी मुद्रासहित ५१ वर्षीया स्विडिस नागरिक कुन्चोक खान्द्रो त्रिभुवन अन्तराष्ट्रिय विमानस्थलबाट पक्राउ पर्नुभएको छ ।

अमेरिकी डलर साढे १० हजार, युरो २६ हजार ७००, चिनियाँ युआन सात हजार ४०० र फेम हन्ड्रा क्रोनर (स्विडेन) ४३ हजारसहित मंगलबार विमानस्थल सुरक्षा कार्यालयबाट खटिएको प्रहरीले उडानतर्फको होल्ड ब्यागेज चेकिङ एरियाबाट उहाँलाई पक्राउ गरेको हो । प्रहरीका अनुसार सिचुवान एयरलाइन्सको उडानमार्फत चीन जाँदैगर्दा पक्राउ गरिएको थियो ।

खान्द्रोलाई आवश्यक अनुसन्धान तथा कारबाहीका लागि राजस्व अनुसन्धान विभागको जिम्मा लगाइएको छ ।