अस्ट्राजेनिका खोप गम्भीर बिरामी हुनबाट रोक्न शत प्रतिशत प्रभावकारी : अध्ययन

एजेन्सी । कोरोना भाइरसविरुद्ध प्रयोग हुँदै आएको अस्ट्राजेनिका खोप गम्भीर बिरामी हुनबाट रोक्न शत प्रतिशत प्रभावकारी भएको प्रमाणित भएको छ । कोलम्बिया विश्वविद्यालय र रोचेस्टर विश्वविद्यालयले गरेको नयाँ परीक्षणबाट खोप प्रभावकारी र सुरक्षित रहेको फेरि प्रमाणित गरिएको हो ।

अध्ययनकर्ताहरुका अनुसार अमेरिका, चिली र पेरुका ३२ हजारभन्दा बढी स्वयंसेवकमा खोप परीक्षण गरिएको छ । परीक्षणबाट खोप लक्षणयुक्त कोरोनाभाइरसको सङ्क्रमण रोक्न ७९ प्रतिशत प्रभावकारी देखिएको छ । अधिकारीहरुले यो खोपले रगत जम्ने जोखिम पनि नदेखिएको परीक्षणको नतिजाबाट पुष्टि भएको जानकारी गराएका छन् । अक्सफोर्ड विश्वविद्यालयका खोप परीक्षणका प्रमुख अध्ययनकर्ता प्राध्यापक एन्ड्रु पोल्ड्रले नयाँ अध्ययनको नतिजाले खोपको प्रभावकारिता पुनः प्रमाणित भएको दाबी गर्नुभएको छ । यसअघि युरोपेली मुलुक लगायत कतिपय मुलुकहरुले खोपको प्रभावकारीता र उपयोगिताप्रति शङ्का गर्दै खोप लगाउन रोकिरहेका बेला सार्वजनिक भएको यो नतिजाले खोप लगाउन छाडेका मुलुकहरुले खोप लगाउने अभियानलाई फेरि निरन्तरता दिने अपेक्षा गरिएको छ ।

कतिपय देशहरुले भने युरोपेली औषधि नियामक निकायले खोप सुरक्षित र प्रभावकारी रहेको दाबी गरेसँगै फेरि लगाउन थालेका छन् । विश्वका धेरै देशमा लाखौँ व्यक्तिले यो खोप लगाइसकेका छन् । कतिपय देशहरुले अहिले पनि यो खोप लगाउने कार्यलाई निरन्तरता दिदा कतिपयले यो खोपप्रति शङ्का उब्जाइरहेका छन् । पछिल्लो परिक्षण नतिजाले भने त्रसित भएकाहरुलाई फेरि ढुक्क भएर खोप लगाउन प्रेरित गरेको छ ।

तस्वीर : रोयटर्स